Nga Luan Kurti
Na gjeti belaja me “një anëtarë një votë” Krimbi na ka hyrë edhe në familje. Nuk ka me statuskuo, që burri është i pari. Kërkojnë ta bëjnë me votim. Dhe unë në familje kam tre femra. Jam në minorancë. Shanset për fitore janë zero. Do përpiqem se mos e kaloj ndeshjen remi (balotazh), të bëj për vete vajzën e vogël. Nuk di se çfarë t’i premtoj, sepse edhe paratë i mban gruaja. Kush ka pushtetin ekonomik ka edhe atë politik. Mundet për ty kanë simpati, por të shohin si kaqol. Dhe meqë e ke marrë tatëpjetën të gjithë nxitojnë të të japin një dorë. Një “r” e burrit në ka rënë prej kohësh. Tani po na heqin edhe tjetrën. E ç’është heqja e dekoratave para kësaj?! Demokracia ka marifete për t’u dukur demokratike. Kërkon shumicë të cilësuar. Me sistemin “një anëtarë një votë”. Votim në fshehtësi: me orjentim nga lartë dhe dakordësim nga poshtë. Ai që e shpiku ka pasur mendjen femër! E ka futur shejtanin në shishe!