Home KRYESORE ISIS I DUKSHËM DHE I PADUKSHËM

ISIS I DUKSHËM DHE I PADUKSHËM

Nga Gaqo APOSTOLI

Aktet terroriste vrasëse dhe vetëvrasëse të ISIS-it që tronditën dhe shpërfytyruar jo vetëm Parisin, por tërë kontinentin tonë dhe më gjerë, u përsëritën dje në Bruksel duke goditur drejtpërdrejt zemrën e Europës. Aktet e terrorizmit dhe kërcënimet e terroristëve rrinë çdo çast si një makth ogurzi mbi shoqërinë njerëzore. Tërë shoqëria dhe komuniteti botëror po përjeton gjithnjë e më tepër një agoni masive nga krimet makabre që mediat i transmetojnë në kohë reale dhe me detaje të llahtarshme…

Çfarë ndodhi sot ? Çfarë do të ndodhë nesër ? Përse ndodhin këto akte terroriste ? Si do të pengohet dhe si do të zhduket terrorizmi dhe ISIS bashkë me të ? …

Në këtë lumë pyetjesh noton truri i lodhur shoqërisë, që reagon me shumë dhimbje e dashuri njerëzore, me lot, me lule e qirinj,për humbjet e viktimave, pa e humbur ende besimin dhe shpresën në të ardhmen.

Liderët botërorë, kontinetalë dhe rajonalë mblidhen periodikisht në Samite të rëndësishme për të sanksionuar marëdhënie mirëkuptimi dhe bashkëpunimi reciprok, si edhe Aleanca Ushtarake, një domosdoshmëri për Paqe, Siguri dhe Zhvillim ekonomik e njerëzor të qëndrueshëm. Ndërkohë, kërcënimet terroriste të ISIS-it kanë mbërritur tashmë në çdo kryeqytet të vëndeve të Europës, pra edhe në Ballkan. Po kush është ISIS ?

1. Ka një ISIS të dukshëm…

ISIS-i dukshëm, që drejton drejtpërdrejt terrorin e tij kryesisht mbi botën e qytetëruar, i cili është i përqendruar në Shtetin Islamik, që, sipas mendimit tim është shfaqja e sotme e së Keqes të Madhe, e Djallit. E vetmja mënyrë për ta frenuar dhe eliminuar menjëherë makinerinë ushtarake të tij do të duhet të ishte veprimi i përbashkët dhe intensiv i potencialit njerëzor, teknik, teknologjik dhe ushtarak i Aleancave në mbrojtje të Paqes dhe Demokracisë në botë, të cilat ende nuk janë koordinuar plotësisht mes tyre me veprime plotësisht të besueshme. Mbështetja e shteteve të rajonit ku është alokuar ISIS, e shoqëruar kjo edhe me mbështetjen e tërë opinionit mbarëbotëror, përfshirë këtu manifestimet masive të komuniteteve të artit, kulturës, medias dhe religjioneve të ndryshme, është një domosdoshmëri jetike.

Ky ISIS i dukshëm ka edhe terminalet e tij, grupet terroriste që shtrihen thuajse në tërë botën, të cilat ndryshojnë nga shkalla e përqendrimit sipas çdo vendi. Për frenimin dhe asgjësimin e këtyre terminaleve të terrorizmit do të duhet të forcohet vazhdimisht bashkëveprimi i derisotëm i shërbimeve inteligjente dhe forcave policore dhe ushtarake të çdo vendi që aspiron dhe lufton për një demokraci globale dhe të drejtat themelore të njeriut. Për më tepër, situata e këtyre terminaleve komplikohet më shumë edhe nga dyndjet masive të refugjatëve që po krijojnë ngulimet e tyre në vendet e Europës, mes të cilëve, padyshim, do të kenë infiltruar edhe elementë të struktura terroriste, që me siguri do të inkorporohen në rrjetin e terminaleve të terrorizmit në Europë.

Eleminimi i ISIS-it të dukshëm është një objektiv që mund dhe duhet të realizohet menjëherë përmes angazhimeve të mësipërme, veprimit të përbashkët dhe intensiv i tërë potencialit njerëzor, teknik, teknologjik dhe ushtarak i Aleancave të mëdha në mbrojtje të Paqes dhe Demokracisë në botë. Afati i këtij eleminimi të ISIS-it të dukshëm është relativisht i përcaktueshëm nga shtabet ushtarake të Aleancave të mëdha që ekzistojnë sot në botë dhe kjo sigurisht që do të ndodhë.

2. Ka dhe një ISIS të padukshëm

ISIS-i padukshëm, potencialisht ekziston kudo në botë, në tërë shoqërinë njerëzore dhe në çdo kontinent, në çdo rajon dhe në çdo shtet, në çdo komunitet dhe në çdo familje, në çdo politikë shtetërore të korruptuar, agresive dhe antinjerëzore, në çdo religjion që shkëput lidhjet me Zotin, i cili është vetëm një. Në këtë abstraksion që po zhvilloj dhe që guxoj ta shpreh këtu, krahas së Mirës që Zoti ka ushqyer me dashuri të pamasë në shpirtin e çdo qënieje njerëzore që në lindje, ekziston edhe e Keqja, që Djalli, duke synuar deformimin e këtij shpirti plot mirësi, hedh embrionin e tij, duke dobësuar imunitetin e krijesave të pastra njerëzore. Në këtë kuptim, ISIS, si simbol i shfaqjes të së Keqes së madhe, i Djallit, ekziston potencialisht në çdo qënie njerëzore, ekziston brenda Meje, brenda Teje, brenda secilit prej Nesh…Dhe varet nga veprimtaria jetësore e çdo njeriu, e çdo familje dhe komuniteti njerëzor, e mbi të gjitha, e tërë zinxhirit njerëzor të shoqërisë, se në cilin drejtim do të shkojë individi, familja, komuniteti dhe tërë shoqëria: drejt së Mirës që ushqen Zoti, drejt dashurisë njerëzore, paqes së qëndrueshme dhe zhvillimit të qëndrueshëm ekonomik dhe njerëzor, apo drejt së Keqes që injekton Djalli, drejt urrejtjes, terrorit dhe luftës botërore, drejt një shkatërrimi të kobshëm.

Eleminimi i ISIS-t të padukshëm është është një mision i madh i tërë shoqërisë, dhe si çdo mision ai kërkon angazhimin e tërë zinxhirit njerëzor të shoqërisë, ai do të zgjasë ndoshta në tërë brezat e ardhshëm njerëzorë, se ka të bëjë me luftën ndërmjet së Mirës dhe së Keqes, por gjithsesi ky angazhim jetik duhet të fillojë që tani, sepse ka një lidhje organike ndërmjet ISIS-it të padukshëm që potencialisht ndodhet tek çdo njeri dhe ISIS-it të dukshëm, është qeliza embrionale e ISIS-it të dukshëm dhe kjo qelizë nuk duhet lënë të shumfishohet.

3. ISIS-i i padukshëm është qeliza embrionale e ISIS-it të dukshëm

ISIS-i i padukshëm përbën qelizat embrionale të ISIS-it të dukshëm dhe këto qeliza nuk duhen lënë të shumfishohen. Kështu, kriminalizimi i politikës, korrupsioni i i tejskajshëm dhe polarizimi i llahtarshëm spekulativ ekonomik dhe social i shoqërisë, në shumë vënde dhe rajone të botës, krijojnë humnera të thella varfërie, në lagështinë e guvave të së cilave shumohen qelizat e krimit potencial që ushqejnë ISIS-in. Agresiviteti i rritur politik brenda një vendi dhe ndërmjet vendeve të një rajoni, ndez urrejtjen që shpërthen në vatra të tensionit dhe konfliktit të armatosur mes tyre, dukuria e sotme e të cilit po shfaqet gjithnjë e më tepër me mjetet e terrorizmit.

Dyndjet e sotme biblike tregojnë se duhet të shëmben barrierat e kufijve që ndajnë popujt nga njëri tjetri dhe bota do të duhet të shkojë detyrimisht drejt ndërtimit të një sistemi komunikimi njerëzor, ekonomik dhe social, sipas parimit të funksionimit të enëve komunikuese. Kjo tregon që globalizimi i ekonomisë do të duhet të zhvillohet në mënyrë harmonike me globalizimin e demokracisë dhe të mbrojtjes së të drejtave themelore të njeriut që të hiqen barrierat që ndajnë popujt, të shpejtohet zbutja e polarizimit ekonomik, rritja e punësimit dhe ulja e varfërisë, të cilat janë vatra që ushqejnë qelizat embrionale të ISIS-it.
Në këtë kohë, kur dhjetra e qindra mijë refugjatë po largohen përmes Ballkanit nga vëndet e origjinës së terrorizmit drejt vendeve të zhvilluara Europiane, duket absurd fakti që të pengohet integrimi i vendeve të Ballkanit Perëndimor në BE apo edhe lëvizja e lirë të qytetarëve të Kosovës. Sigurisht, angazhimet efektive për integrimin e shpejtë në BE dhe liberalizimin e vizave janë një domosdoshmëri, por edhe rritja e tolerancës së BE në këtë proces, përbën një detyrim vital i saj.

Duke shërbyer si hapësirë tranzite dhe urë kalimi për dyndjet masive të refugjatëve dhe për ngulimin e tyre, si edhe duke u ndodhur në një situatë, që fillimisht do të ketë më shumë Sfida të rrezikshme se sa Oportunitete, Ballkani, duhet të vlerësohet nga BE, më me shumë ndershmëri e zemërgjërësi për gatishmërinë e tij, në këtë situatë të rrezikshme me ISIS-in në prag. Sot është e një rëndësie vendimtare angazhimi në rritjen e veprimtarisë jetësore e çdo njeriu, e çdo familje, e komunitetit njerëzor, e mbi të gjitha, e tërë zinxhirit njerëzor të shoqërisë, në mënyrë që çdo individ, familja, komuniteti dhe tërë shoqëria të shkojë drejt së Mirës që ushqen Zoti, drejt dashurisë njerëzore, paqes së qëndrueshme dhe zhvillimit të qëndrueshëm ekonomik dhe njerëzor. Është një domosdoshmëri angazhimi global i tërë institucioneve shtetërore e publike, të OJF-ve të specializuara në fushën e arsimimit dhe edukimit të publikut dhe sidomos rinisë, me parimet e ndërtimit të Paqes së Qëndrueshme, që e ka bazën në dashurinë e vërtetë në të gjitha elementët e shoqërisë njerëzore: në harmoninë brenda vetë njeriut, brenda familjes, në komunitet dhe në tërë shoqërinë. Edukimi i këtyre parimeve nuk do të lejojë ISIS-in e padukshëm, të Keqen e Madhe, Djallin, që të injektojë embrionin e tij për të dobësuar imunitetin e shpirtit të krijesave të pastra njerëzore. Dhe kështu, në Shpirtin e Njeriut do të mbretërojë Dashuria e pamasë e ushqyer plot dashuri nga Zoti ….

Share: