Kryeministri Edi Rama ka komentuar për herë të parë vendimin e Gjykatës Kushtetuese për pezullimin e ligjit për rivlerësimin e gjyqtarëve dhe prokurorëve, i njohur ndryshe edhe si vettingu.
Këtë e ka bërë në faqen e tij në rrjetin social fb.
Në përgjigje të pyetjes së një komentuesi se çfarë do të bëjë Kryeministri pas vendimit të Kushtetueses, Rama përgjigjet: Nuk kanë ku shkojnë, jo (gjyqtarët).
Implementimi i reformës në drejtësi tashmë është sërish në duart e institucioneve ndërkombëtare dhe peshën kryesore tashmë e ka Komisioni i Venecias, institucion që këshilloi në detaje politikën shqiptare në gjithë proçesin e hartimit të ndryshimeve kushtetuese.
Venecias i duhet të japë një këshillë që do rezultojë deçizive në vendimin e Gjykatës Kushtetuese shqiptare në lidhje me ligjin që qëndron në themel të fillimit të implementimit të reformës, ai që do të rivlerësojë gjyqtarët dhe prokurorët.
Prej kohësh kryeministri Edi Rama mbetet aktiv në rrjetet sociale. Ai u kthen përgjigje komenteve pikante në statuset e publikuara prej tij. Por së fundmi e ka nervozuar keq një koment që i drejtohet me fjalët: “Bëni reforma deri në fund të mandatit, se për lesh ke për të shku… as azil nuk kanë me të pranu”.
Nuk ka munguar përgjigjja e Ramës.
“Unë qaj hallin tend se ku mund te shkosh ne jete me kete edukate dhe padije qe ta reflekton maja e gjuhes, prandaj miqesisht te sugjeroj sa me shume libra miku im se iken shpejt koha e s’mjafton nje profil fb per te share e per te bere gallate qe te jetosh si njeri”, – i përgjigjet Rama.
