Home KRYESORE Vetingu fillon punë brenda muajit dhe deri në mars konstituohen të gjitha...

Vetingu fillon punë brenda muajit dhe deri në mars konstituohen të gjitha institucionet

Nga Aristir Lumezi

Unë kam besim se do të gjenden 10 policë, 10 prokurorë dhe 10 gjyqtarë të ndershëm dhe me integritet moral e profesional, të cilët do të bëhen pjesë e institucioneve të reja, duke pasur paga më të mira, trajnime nga institucionet më të mira amerikane të së drejtës dhe monitorim nga misioni amerikan që monitoron këtë reformë”, ishte përgjigjja e Xhafajt ndaj pyetjes së deputetit Paulin Sterkaj, se njerëz të pavarur për të qenë pjesë e SPAK-ut mund të gjenden vetëm në Befotrof (shtëpia e fëmijës).

“Vetingu fillon punë brenda muajit dhe deri në mars konstituohen të gjitha institucionet”, i është përgjigjur Xhafaj pyetjes së deputetit Artan Gaçi, i cili pyeti se kur fillojnë nga puna institucionet e reja që krijohen nga kjo reformë. Një tjetër shqetësim i deputetëve socialistë ishte edhe fati i ligjit të vetingut, për të cilin Partia Demokratike është shprehur se do ta dërgojë në Gjykatën Kushtetuese.

Deputeti Xhemal Qefalia e ka pyetur kryetarin e Komisionit të Posaçëm të Reformës në Drejtësi nëse cenohen ligjet e tjera, nëse Gjykata Kushtetuese e rrëzon ligjin e vetingut. Xhafaj shpreson që kjo gjykatë të mos e rrëzojë ligjin e vetingut, por sipas tij, ligjet e tjera nuk cenohen nga fati i vetingut në Kushtetuese.

Konsensusi

Opozita pritet të votojë të enjten vetëm ligjin për ngritjen e SPAK-ut, pas ndërmjetësimit të ekspertëve amerikanë të OPDAT-it, ndërsa të mos votojë asnjë nga ligjet e tjera, teksa do t’i drejtohet Gjykatës Kushtetuese për ligjin e vetingut.

Ndërkohë që pesë projektligjet e tjera pritet të miratohen vetëm me votat e maxhorancës. Bëhet fjalë për projektligjin “Për organizimin dhe funksionimin e Prokurorisë së Përgjithshme”, projektligjin “Për organet e qeverisjes së sistemit të drejtësisë”, nisma “Për statusin e gjyqtarëve dhe prokurorëve”.

Po ashtu, nisma tjetër që pritet të kalojë pa konsensus do të jetë projektligji “Për organizimin dhe funksionimin e Gjykatës Kushtetuese”. Këto nisma ligjore mund të miratohen vetëm me shumicë të cilësuar, vota të cilat maxhoranca e majtë, PS-LSI-PDIU, ka më shumë se 84 vota.

Maxhoranca dhe opozita arritën marrëveshjen për një prej projektligjeve më të rëndësishme të paketës së Reformës në Drejtësi. Kjo nismë, e cila kundërshtohej nga opozita, është ndryshuar sipas propozimeve të saj dhe për këtë arsye, demokratët konfirmuan votën pro vetëm për këtë projektligj.

Me këtë nismë ligjore parashikohet ngritja e Prokurorisë dhe Gjykatës së Posaçme Antikorrupsion, si dhe Byronë Kombëtare të Hetimit. Nga tri çështjet e kundërshtuara prej demokratëve dy javë më parë, ishte lënë pa zgjidhur vetëm njëra prej tyre, ajo që lidhej me shqetësimin e opozitës për ndikimin e Qeverisë në emërimin e gjyqtarëve, prokurorëve apo punonjësve të SPAK-ut.

Marrëveshja e arritur bazohet tek amendamenti i paraqitur nga opozita në mes të shtatorit, e cila parashikon që kontrolli i figurës dhe i pasurisë fillimisht të bëhet nga organi që do të kryejë vetingun dhe më pas ky proces do të kryhet nga një komision “ad hoc”, i përbërë nga anëtarë të tri strukturave të SPAK-ut./Aristir Lumezi

Share: