Home KRYESORE Protesta e PD/ Debate gjatë mbledhjes, Halimi pro Berishës: Të djegim mandatet

Protesta e PD/ Debate gjatë mbledhjes, Halimi pro Berishës: Të djegim mandatet

0

Partia Demokratike dhe fronti opozitar do të mblidhen për të protestuar përpara Kryeministrisë mesditën e 27 janarit. Vendimi është marrë nga kreu i PD, Lulzim Basha, pas mbledhjes së Grupit Parlamentar Demokrat dhe takimit me kryetarët e degëve të PD në rrethe.

eduard_halimi

VENDIMI

Përpara se të vendoste për datën e protestës, kreu i PD-së, Lulzim Basha, diskutoi me Grupin Parlamentar marrëdhënien që demokratët do të mbajnë me Parlamentin, seanca e parë e të cilit është më 15 janar. Burime nga takimi me dyer të mbyllura konfirmojnë se Basha u ka deklaruar deputetëve të tij se të gjitha opsionet për marrëdhënien me Parlamentin janë të hapura duke nisur që nga bojkoti i Parlamentit dhe deri te djegia e mandateve parlamentare.

Të njëjtat burime sqarojnë se, gjatë diskutimeve në Grupin Parlamentar, deputeti i PD Eduard Halimi ka theksuar se nëse opozita do të jetë mes alternativës së bojkotit parlamentar dhe djegies së mandateve, të mbështesë propozimin e ish-kryeministrit Berisha.

“Nëse në diskutim janë opsionet për bojkot apo djegie të mandateve, unë personalisht do të isha për opsionin e propozuar nga doktor Berisha, që është ai për djegien e mandateve. Ato që ndodhën në Parlament, me bllokimin e foltores kur do të fliste Berisha dhe kapjen drejtësisë me zgjedhjen e një Kryeprokurori të njëanshëm, ishin padyshim ngjarje të rënda. Por një bojkot do të ishte i dëmshëm për PD. Bojkoti që mund t’i bëhet Reformës në Drejtësi është i dëmshëm pasi e favorizon kundërshtarin, duke ia lënë atij tërësisht rrugën të lirë për kapjen e plotë të drejtësisë”, mësohet të ketë deklaruar Halimi në mbledhjen e Grupit Parlamentar.

Kreu i opozitës, Basha, ka konfirmuar se PD do të marrë pjesë në seancën e 15 janarit për të bërë aksionin, ndërkohë që protesta e 27 janarit do të jetë përcaktuese për qëndrimin që do të mbajë në raport me Parlamentin.

Thirrja e Bashes 

“Ftojmë të gjithë shqiptarët të na bashkohen më datë 27 janar, të shtunën, në orën 12.00, në një protestë mbarëpopullore kundër varfërisë, kundër krizës ekonomike, kundër papunësisë, kundër padrejtësisë dhe drejtësisë së kapur politikisht, për një drejtësi të çliruar nga krimi, të çliruar nga politika dhe pushteti i bërë njësh me krimin. Drejtësi për të papunët, drejtësi për të rinjtë, drejtësi për studentët, drejtësi për ata që duan ta ndërtojnë jetën në Shqipëri dhe jo të largohen si emigrantë dhe t’i dorëzohen fatit e rrugëve të kurbetit”, deklaroi kreu i PD-së.

Basha kujtoi se çdo shqiptar ka arsye për t’iu bashkuar protestës së 27 janarit përpara Kryeministrisë, pasi të gjithë po vuajnë keqqeverisjen dhe pasojat e saj.

“Pasojat e paligjshmërisë i ndien çdo shqiptar. Papunësia ka për rezultat paligjshmërinë, e cila i merr pasuritë dhe paratë e taksapaguesve të këtij vendi dhe i shpërndan te një grusht sunduesish, në vend që t’i çojnë në spitale, që vuajnë nga mungesa e ilaçeve, nga mungesa e mjekëve dhe infermierëve, në vend që t’i çojnë në shkollat që nuk kanë ngrohje, në vend që t’i çojnë në investime, të hapin vende të reja pune, duke ndihmuar ekonominë”, tha Basha./PANORAMA

Share:
Reklama juaj