Nëse thirrja e qytetarit për kreun e PD do të ishte bërë në Kukës, Tropojë, Memaliaj apo Shkodër, bastione historike të së djathtës, do të ishte mëse normale. Por kur apeli vjen në një nga bastionet kryesorë të PS, pikërisht në Ballsh të Fierit, kjo tregon se situata ka vajtur atje ku nuk mban më. Tashmë ajo që quhet keqqeverisje dhe pushtet i PS-së me krimin, nuk është një realitet që e thonë vetëm opozitarët, por po e provojnë përditë edhe socialistët.
Situata e vështirë ekonomike dhe problemet e shumta me të cilat ndeshen shqiptarët ka bërë që ndryshimi i modelit të qeverisjes të mos vijë më si kërkesë e politikës, por e vetë qytetarëve. Si rrallëherë në historinë e protestave në vend, qytetarët janë një hap para liderëve të opozitës duke kërkuar jo më tubime formale, ku flasin liderët dhe më pas ikin në shtëpi. Ata duan zgjidhje me 16 shkurt. Në mënyrë më të saktë realitetin në të cilën ndodhen sot pjesa më e madhe e qytetarëve e shpjegon dialogu që ka zhvilluar dje në Ballsh kryetari i Partisë Demokratike, Lulzim Basha me banorët e këtij qyteti. Gjatë takimeve në rrugët e Ballshit me banorët, Basha i është afruar një qytetari me fjalët “si je”, përgjigja e tij ka qenë: Per faqe te zeze!
Më tej qytetari ka vazhduar duke iu drejtuar Bashës me fjalët: “O rrëzoje atë, ose ik edhe vetë, Luli”.
– “E keni në dorë ju”,-është përgjigjur Basha, duke i thënë qytetarit se tashmë rrugët politike kanë mbaruar dhe duhet të marrin në dorë fatet e tyre.
-“E kemi ne, por edhe ti. Dilni për zot ose hajde ikim pastaj”,- ka vijuar qytetari, i cili i ka kërkuar Bashës të zgjidhë problemet e naftëtarëve nëse vjen në pushtet.
Në Ballsh deklaratat e një qytetari, që jo detyrimisht është militant partie, merr më shumë vlerë për të kuptuar se çfarë zien në rrethe dhe që politikanët këtu në Tiranë nuk e kuptojnë, të gjithë. Ballshi është një qytet që njihet si bastion i majtë. Me ndonjë përjashtim në zgjedhjet vendore, në thuajse të gjitha zgjedhjet parlamentare Partia Socialiste votohet me mbi 50 përqind të votave. Është një zonë elektorale ku deputetët e PS-së thonë “nuk kemi nevojë të bëjmë fushatë, aty fitojmë edhe duke varur vetëm xhaketën”. Nëse thirrja e qytetarit për kreun e PD do të ishte bërë në Kukës, Tropojë, Memaliaj apo Shkodër bastione historike të së djathtës, do të ishte dukur mëse normale. Por kur apeli vjen në një nga bastionet e PS, kjo tregon se situata ka “vajtur atje ku nuk mban më”. Tashmë ajo që quhet keqqeverisje nuk është një realitet që e thonë vetëm opozitarët, por po e provojnë përditë edhe socialistët e bindur që shohin një diferencë të madhe mes reklamave të pushtetit në ekrane dhe problemeve që hasin përditë.
Apeli i djeshëm drejtuar opozitës nuk është i vetmi. Në Shkodër, një socialist i kërkoi të njëjtën gjë kryedemokratit Basha duke i sugjeruar në mënyrë të prerë, që këtë herë të mos i lodhi njerëzit vetëm me fjalime në 16 shkurt. Mesazhi për kreun e PD është i qartë. Zhgënjimi nga qeveria ka arritur kulmin dhe njerëzit nuk duan më premtime boshe, mitingje festive dhe fasada. Qeveria e PS dhe kryeministri Edi Rama patën mundësinë të tregonin se çfarë mund të bënin për më shumë se 6 vite. Nga opozita dhe kreu i PD-së tani kërkohet zgjidhja e situatës dhe vendosmëria politike për të ndryshuar situatën, duke u përballur me kryeministrin.
Data 16 shkurt po vjen shpejt dhe opozita ka vendosur ta rrëzojë kryeministrin Rama atë ditë duke kërkuar të krijohet një Qeveri për Integrimin në BE, e cila do të garantojë zgjedhje të lira e jo të fituara nga krimi. Investigimet e “Zëri Amerikës” kanë goditur dy shtyllat kryesore të paligjshmërisë së viteve të fundit në Shqipëri. E para është korrupsioni qeveritar që ka arritur nivelet më të larta me koncesionet dhe kompanitë fantazmë. E dyta dhe më rëndë është vjedhja e zgjedhjeve dhe mbajtja në këmbë e një pushteti ilegjitim që nuk ka marrë votën reale të qytetarëve. Që të dyja këto skandale kanë prodhuar varfëri dhe një qeverisje që është shkëputur nga realiteti ku jetojnë shqiptarët. Ndaj dhe thirrja për ndryshim, si në pak raste, po vjen nga qytetarët dhe jo nga politika. Lulzim Bashës si mbetet tjetër veçse të të mos zhgënjejë pritshmëritë që njerëzit kanë ndaj opozitës. Në të kundërt jo vetëm do të humbasë rastin për të ndryshuar historinë e opozitës së gjatë të PD, por edhe një herë mund të akuzohet si bashkëpunëtor i zgjatjes së pushtetit të Edi Ramës./360grade.al
