Home KRYESORE Rama: Ja pse jam kundër Kryemadhit. Arta Marku nuk është “e pafajshme”

Rama: Ja pse jam kundër Kryemadhit. Arta Marku nuk është “e pafajshme”

Luan Rama numri II i LSI nuk mendon njësoj si kryetarja e saj e partisë dhe këtë ka dashur ta ndajë edhe me opinionin publik. Përmes një statusi në facebook, ai shkruan se Arta Marku nuk është aq e pafajshme sa e paraqet Kryemadhi në deklaratat e saj. Luan Rama thotë se Marku pranoi të shkelte Kushtetutën në rresht me mazhorancën.

Statusi i plotë i Luan Ramës

Nuk jam dakord me ju zonja Kryemadhi!

Që prej votimit antikushtetues në Kuvendin e Shqipërisë, kur zonja Arta Marku u caktua si prokurore zëvendësuese e Prokurorit të Përgjithshëm e në vijim, ju kam dëgjuar në të gjitha prononcimet tuaja publike të shpreheni se “nuk jemi kundër Artës e nuk kemi gjë me të, por me praktikën antikushtetuese dhe antiligjore që u ndoq nga ana e Partisë Socialiste”.

Më lejoni zonja Kryemadhi t’ju shpreh objeksionet e mia, përkatësisht edhe kundërshtimin tim ndaj këtij qëndrimi të shprehur nga ana juaj, pasi zonja Arta Marku, me apo pa vetëdije, u bë pjesë e lojës politike të Partisë Socialiste për të deformuar e penguar reformën në drejtësi dhe pranoi të zëvendësojë Prokurorin e Përgjithshëm, e mbështetur vetëm nga votat e urdhëruara të Kryeministrit dhe klanit të tij!
Një prokuror me integritet qytetar dhe profesional, një profesionist që karrierën e bazon në zotësitë profesionale dhe jo në konjukturat politike, një jurist që i falet vetëm ligjit dhe jo urdhërit politik, nuk do të pranonte të caktohej në një detyrë në kundërshtim me Kushtetutën dhe përmes një një procesi krize dhe konflikti politik!

Procesi antikushtetues dhe antiligjor i kapjes politike të Prokurorit të Përgjithshëm nuk është as virtual dhe as imagjinar. Ai ka autorë realë, ka protagonistë, ka aktorë, ka njerëz përgjegjës, dhe Arta Marku është një ndër ta!

Share: