Home KRYESORE Reforma e Qërimit!

Reforma e Qërimit!

Nga Aulon Kalaja

Ministri i Punëve të Brëndëshme, zoti Saimir Tahiri për të disatën herë ka dalë në deklaratë për shtyp duke goditur gjyqtarët. Ky nuk është një lajm i ri, kur kemi parasysh sulmet e paprecedenta ndaj gjyqtarëve të tjerë, që kanë qënë nën vallen e “Gjuetisë së Shtrigave”.

Po cfarë tha në të vërtetë Ministri Tahiri, sepse faktet tregojnë se ai nuk foli me gjuhën e tij, por me gjuhën e një profani që nuk ia ka idenë ligjeve të këtij vendi. Duket pra se Tahiri nuk njeh procedurat bazë se si funksionon shorti i gjyqtarëve, në një rrjedhë normale se si organizohen punët brënda një gjykate të caktuar.

Për dijeni të Ministrit tim dhe këshilltarëve të tij që e nxorrën blof, për të disatën herë, puna në një gjykatë organizohet në mënyrë të tillë:

Për cdo cështje të sjellë nga Prokuroria për gjykim, gjatë fazës së hetimit paraprak, kopetent është Gjyqtari i Hetimit, i cili sipas ligjit për procesin gjyqësor përcaktohet në fillim të cdo muaji me urdhër të Kryetarit të Gjykatës, sipas rendit alfabetik të mbiemrave të gjyqtarëve. Kjo do të thotë se, gjatë gjithe fazes së hetimit paraprak nuk ka lidhje shorti elektronik apo manual për caktimin e gjyqtarit. Ndërkohë shorti futet si procedurë për individualizimin e Gjyqtarit Natyral, vetëm kur janë mbyllur hetimet paraprake dhe është paraqitur kërkesa për gjykim nga Prokurori.

Megjithatë nuk dua të zgjatem me njohuritë mesatare të Procedurës Penale, sepse nuk ka “sy për qabe” që Ministri që është “shkolluar” për drejtësi dhe këshilltarët e tij, të marin vesh nga kjo procedurë. E thënë me pak fjalë, të gjitha deklaratat për shtyp të Tahirit kanë qënë “bllof” dhe në rastin më të mirë është bërë qesharak për ata që e njohin ligjin.

Por Tahiri nuk ndalet këtu, ai ka sulmuar në një mënyrë të pakuptimtë edhe Kryetarin e Shtetit, Presidentin e Republikës, zotin Bujar Nishani, në këtë rast në cilësinë edhe të Kreut të Këshillit të Lartë të Drejtësisë, i cili është njeriu që nuk ka lidhje me këtë histori. Duket pra se sulmi i përqëndruar dhe i mirë-organizuar nga kasnecët apo “benjaminët” e Ramës është kthyer në qëllim në vetvete. E bëjnë me radhe, një herë e sulmon Kryetari i Bashkisë së Tiranës, zoti Erion Veliaj që bëri dhe protestë kundra gjyqtarëve dhe me një fjalor rruge sulmoi Presidentin, ndërsa herën tjetër kafshon Tahiri, Ministri i Punëve të Brëndëshme, “snajperi” i Ramës.

Po me Presidentin e Republikës c’patët?! Më kujtohet ajo barseleta “prapë me flokë të gjata ti? Se cfarë mendimi ka Kryeministri Rama për Presidentin Nishani, e shprehu 3 ditë më parë ku tha se, KLD është një bandë që duhet c’montuar, e kur iu kthyen gazetarët, at’herë ai e ktheu dhe tha se e kishte fjalen për “bandë muzikore”. Kjo nuk është serioze.

Ndërkohë, Saimir Tahiri në një prej deklaratave të tij të shpeshta për shtyp ka ngritur këtë pyetje ndaj Presidentit të Republikës:
“Unë dua të pyes Presidentin e Republikës, Kryetarin e Këshillit të Lartë të Drejtësisë:

Për cilën arsye u përzgjodh gjyqtari Arjan Aliaj, i cili është shkarkuar nga detyra sepse me vendimin nr. 61 datë 13.10.1999 ka liruar nga burgu një person të dënuar 14 vjet për “Marrëdhënie seksuale me dhunë”?

Për cilën arsye u përzgjodh gjyqtari Arjan Aliaj i shkarkuar sepse me vendim nr. 32 ka liruar nga burgu një person të dënuar për “Vrasje me dashje e mbetur në tentativë” dhe “Armëmbajtje pa leje”?

Për cilën arsye u përzgjodh gjyqtari Arjan Aliaj që ka dhënë të paktën dhe katër vendime të tjera se liroi nga burgu të dënuar që kanë kryer vepra të rënda penale si “Vjedhja me armë” e “Vjedhja me dhunë”?

Për cilën arsye u përzgjodh një gjyqtar që ka liruar vrasës dhe përdhunues?

Për cilën arsye u shkel ligji, u thye rregulli dhe u përzgjodh jashtë shortit pikërisht ky gjyqtar?

Përpara se të ngresh këto pyetje, zoti Ministër, pse nuk pyesni veten se përse ju nuk u ankuat kur gjyqtari që po kryqëzoni sot, zoti Arjan Aliaj ka dhënë një vendim në favorin tuaj për cështjen e “kontrabandës më ilacet” që u akuzua babai juaj Bashkim Tahiri. Apo at’herë ishte gjyqtar i mirë ky, sepse vendosi në favorin tuaj?! Dy standarte nuk mund të ketë, aq më tepër që ju na “lodhët” me Reformën në Drejtësi, një cështje aq shumë e trumpetuar për ju, që po ju bllokojnë.

Duket sikur e keni kthyer në kauzë për të marë në qafë gjyqtarë të ndryshëm të këtij vendi. Gjyqtarë të cilët ato pak herë që vendosin kundër jush, i anatemoni, sulmoni dhe i nxirrni nga arkivat e errëta lloj-lloj historishë të sajuara, si e si që t’ju japin të drejtë, në një histori ku ju thjesht “ia fusni kot”.

Me këtë standart Kryeministri Rama dhe kasnecët e tij minojnë drejtësinë shqiptare dhe nuk të japin asnjë shpresë për Reformën e shumëpritur. Sepse e ardhmja do të jetë po njësoj. Ai gjyqtar, ose gjyqtare që vendos kundër Ramës dhe të tijëve do të persekutohet, do ngrini konferenca shtypi, gijotina, do ngrini kafshuesit e rrjeteve sociale, për t’ia bërë të pamundur punën, për t’i shkarkuar dhe për të vënë aty besnikët tuaj, që do të jenë “kamikazët” e partisë. Ju po krijoni mitin e gjyqtarit, “yes-man”. Vetëm Kapterri ka të drejtë, kujdes me Kapterrin, sepse Kapterrit nëse nuk i pëlqen vendimi të telefonon, të shantazhon, të kërcënon dhe të Qëron.

Zoti Kryeministër dhe zoti Ministër i brëndëshëm, ju thoni se “Reforma në Drejtësi” po bëhet që gjyqtarë të tillë të “qërohen” nga sistemi. E kur lexohet me këtë “kod”, historiku i vendimeve të gjykatave kundër jush, si dje në opozitë dhe sot kur po qeverisni, mesazhi është i qartë:

“Do qërohen të gjithë gjyqtarët dhe prokurorët, që nuk na kanë shërbyer. Mesa duket “lista e qërimit” qënka gati, ia paskeni vënë syrin që më herët. E nëse është kështu, at’herë kuptohen mbiemrat e institucioneve “monstra kushtetuese” të reja që priten të ndërtohen, si, Komisioni i Qërimit të Shkallës së Parë, Kolegji i Qërimit në Apel, Këshilli i Lartë i Qertimit, që në tërësi përbëjnë “Qërim Process”…

Share: