Në SHBA, shkarkimi është hapi i parë i parashikuar në kushtetutë nga dy veprimet që çojnë në largimin e Presidentit nga zyra për “tradhti, ryshfet si dhe krim apo keqbërje të rëndë”. Por, e gjitha kjo është e lidhur me popullaritetin e presidentit në elektorat si dhe mbështetjen që ai ka brenda partisë së tij.3000
Që tani kabineti i Trump ka dalë kundër tij dhe thuajse çdo propozim politik i tij, përfshirë qëndrimin pro-rus, ka ngritur shumë pikëpyetje se si kjo do të ndikojë në mbështetjen e Kongresit për Presidentin.
Ekspertët mendojnë se shkarkimi i Trump mund të vijë pasi Trump gjithashtu po përpiqet të prishë aleancën me NATO-n dhe të krijuar marrëdhënie të afërta me Putinin.
Kështu që veprimi i Kongresit mund të jetë dhe një akt politik, duke pasur parasysh këtu edhe rastin e Bill Clinton, ku procesi i shkarkimit mund të kishte ndodhur vetëm për arsyen se partia në opozitë kishte kontrollin e Kongresit. Por, tani që Kongresi kontrollohet nga Partia Republikane, shkarkimi i Trump mund të vijë vetëm pasi ai të ketë humbur mbështetjen në publik, pasi vetëm kështu kongresmenët republikanë mund të binden për të votuar pro shkarkimit të tij.
“Në rastin e Trump, fillimisht duhet të binden kongresmenët republikanë për shkarkimin e një presidenti republikan, që mund të dështojë nëse ai ka ende mbështetjen e publikut – siç ndodhi me Clinton dhe mund të ketë sukses nëse nuk e ka – siç ndodhi me rastin e dorëheqjes së Nikson”, shprehet, profesori i shkencave politike, Terrence Casey.
Nëse do të provohet se Moska ka materiale kompromentuese për presidentin e zgjedhur me siguri që republikanët do të votonin për shkarkimin e tij.
Por rreziku nuk vjen vetëm nga “dosja ruse” pasi shqetësim përbën edhe deklarata e Trump që bëri të mërkurën kur tha se do ta kalojë kontrollin e kompanisë së tij te djemtë e tij, gjë e cila mund të përbëjë konflikt interesi.
Ana pozitive për Trump qëndron në faktin se ai ka aftësinë për të luajtur me median, pasi që prej viteve 1980 ndaj tij ka pasur 15 akuza për ngacmim seksual, fakt që votuesit e tij as që e përfillën.
Por, nga ana tjetër kritikët e hershëm të tij John McCain dhe Lindsey Graham, duken të vendosur për të bërë transparencë deri në fund.
Shkarkimi i presidentit të 45-të të SHBA-ve mund të sjellë një zhvillim politik që nuk ka ndodhur kurrë më parë, kur partia shkarkon një president të krahut të saj.
Pasi shkarkimi miratohet nga Kongresi, më pas kalon për miratim në Senat, ku kërkohen 2/3 e votave. Deri tani asnjë president amerikan nuk është larguar nga detyra me anë të shkarkimit. Riçard Nikson dha dorëheqjen para votimit, kurse Andreu Xhonson dhe Bill Klinton u falën nga Senati./Lapsi.al
