Home KRYESORE A thua Serbia i pyeti shqiptarët kur ua mori lirinë më 1912?

A thua Serbia i pyeti shqiptarët kur ua mori lirinë më 1912?

Nga Sokol Shameti

Ivica Daçiçi flet për marrëveshje historike me Kosovën por thotë se Serbia nuk do të pranojë kurrë atë që shqiptarët kanë shpallur në mënyrë të njëanshme.

E ka fjalën për pavarësinë prej një okupacioni gati 90-vjeçar. A thua se ky okupacion u krye me marrëveshje të dyanshme. A thua vendimi i serbëve për t’u vetëshpallur zot në shtëpinë e tjetërkujt, ka pasur ndonjëherë pëlqim të dyanshëm. A thua Serbia i pyeti shqiptarët kur ua mori lirinë më 1912, kur i shfrytëzoi në mënyrë koloniale, i përndoqi, vrau dhe i shkombëtarizoi.

Por në fund të fundit, Daçiçi thjesht na dëshmon me fjalët e tij të vërtetën e asaj ç’ndodhi në Kosovë. Nuk ka pushtues që e pranon me dëshirë çlirimin e atij që ka mbajtur nën vargonj. Nuk ka liri që fitohet me miratimin e atij që ta ka privuar këtë liri.

Mes agresorit dhe të sulmuarit, papajtueshmëria është kusht i domosdoshëm. Veçse për viktimën kjo është papajtueshmëri me pozitën e viktimës, ndërsa në rastin e agresorit është papajtueshmëri me lirinë e tjetrit.

Për sytë e botës, ndryshimi në lloj mes këtyre papajtueshmërive është prova e gjallë e rolit të secilit mes nesh në këtë histori.

Share: