Home KRYESORE Deklarata e fortë e Majlinda Ketës: Rama vodhi ligjin e Berishës për...

Deklarata e fortë e Majlinda Ketës: Rama vodhi ligjin e Berishës për arsimin e lartë

Ish drejtoresha e Arsimit per Tiranen dhe aktualisht pedagogia Majlinda Keta ka lëshuar akuza të forta për kryeministrin Rama dhe mënyrën sesi ai po menaxhon krizën në sektorin e arsimit. Ajo ka deklaruar se ligji për arsimin e lartë që qeveria miratoi në 2015-ën është i njëjti draft që ka sjellë më herët edhe Berisha dhe që po në atë kohë, u kundërshtuar ashpër nga akademikët, që penguan miratimin e tij.

Majlinda Keta e bëri deklaratën e fortë teksa ka komentuar për News 24 fjalinë tashmë të famshme të ish ministres së Arsimit, Lindita Nikolla se duhet të largohej nga qeveria, pasi “gota i plasi në dorë”.

“Gota e plasur në dorë do të kishte qenë e krisur, që kur e ka marrë në dorë. Vodhën draftin që solli Berisha dhe që nuk e miratoi dot, për shkak të oponencës së akademikëve. Për habi, e majta arriti ta kalonte këtë moment dhe ta shpallte si element reformator, në kundërshtim me moralin e së majtës. Ligji i 2015-ës nuk është gjë tjetër, veçse ligji që përçon frymën e të djathtës në arsim”, shprehet Keta.

Pedagogia e njohur shpjegon se pasojat e ligjit kanë filluar të ndihen tek brezi i parë i të diplomuarve me cilësi shumë të dobët. “Pas 3 vjetësh, ligji ka prodhuar viktimat e tij, në drejtim të cilësisë së dobët. Kryeministri është i njohur me situatën dhe oponencën e akademikëve. Duhet amenduar ligji, duhet rishqyrtuar ligji. Duhet një dialog me pedagogët dhe një kthesë nga ana e kryeministrit”, shprehet ajo.

Për Majlinda Ketën situata në arsimin e lartë është përkeqësuar edhe më shumë nga vendimet e qeverisë, në kuadër të Paktit për Universitetin.

“Kjo gotë po u mbajt akoma do të pëlcasë. Gjendja është agravuar me VKM-të e 26 dhjetorit. Ato janë kundër Kushtetutës. Ministrja e re vjen pa eksperiencë për situatën në universitete”, deklaron Majlinda Keta teksa apelon qeverisë që të reflektojë për të gjetur një zgjidhje me akademikët, që do ti kënaqte të dyja palët.

Share: