Home Gjeo-Ekonomia “Turqia nuk do të përkulet para kërcënimeve për Mesdheun Lindor”, Erdogan kërkon...

“Turqia nuk do të përkulet para kërcënimeve për Mesdheun Lindor”, Erdogan kërkon negociata

Presidenti turk, Recep Tayyip Erdogan, deklaroi sot se Turqia nuk do të përkulet ndaj kërcënimeve për mosmarrëveshjen me Greqinë dhe Qipron rreth pretendimeve detare në Mesdheun Lindor, ndërsa ministrat e jashtëm të Bashkimit Europian u takuan në Bruksel për të diskutuar mbi këtë çështje.

“Në çështjen e Mesdheut Lindor, vendi ynë kurrë nuk përballet me tensionin, por me paqen, bashkëpunimin, ndershmërinë dhe zbatimin e drejtësisë. Rruga për këto shkon përmes negociatave të bazuara në respekt të ndërsjellë”, tha Erdogan.

Ministri i Jashtëm grek Nikos Dendias tha se të gjitha shtetet e BE-së ranë dakord të hënën se Turqia nuk kishte bërë asnjë ndryshim pozitiv nga politika e saj e eksplorimit në ujërat e diskutueshëm në Mesdheun lindor, gjë e konfirmuar edhe nga diplomatët e BE-së.

Tensionet u ndezën në gusht, kur Ankaraja dërgoi një anije eksplorimi në ujërat e pretenduara gjithashtu edhe nga Greqia. Ankaraja dhe Athina ranë dakord të rinisnin bisedimet mbi pretendimet e tyre detare në shtator, duke i dhënë fund një ndërprerjeje 4-vjeçare.

Gjermania kishte shpresuar të ndërmjetësonte bisedimet midis Athinës dhe Ankarasë, por u zemërua kur Turqia rifilloi eksplorimet e gazit nga Qiproja në tetor pas një pauze.

Krerët e BE i kërkuan Turqisë në tetor të ndalonte eksplorimin në ujërat e kontestuara të Mesdheut lindor ose do të përballej me pasoja. Presidenti i Këshillit Europian Charles Michel paralajmëroi Turqinë të mos luante “si macja me miun” duke kthyer anijet e eksplorimit në port pak para takimeve të BE-së.

Franca dhe Parlamenti Europian, i cili zyrtarisht bëri thirrje për sanksione në 26 nëntor, kanë deklaruar se është momenti për të ndëshkuar Turqinë./abcnews.al

Share: