Nga Erblina Mile
Financat e familjeve shqiptare janë dëmtuar rëndë nga pandemia gjatë 2020. Rritja e numrit të papunëve si dhe ulja e pagave për shkak të kufizimeve ka bërë që qytetarët të pësojnë një rënie të konsiderueshme të ardhurave për frymë në një vit.
Të dhënat e ministrisë së financave në kuadrin makroekonomik 2022-2024 tregojnë se të ardhurat për banor kanë pësuar një ulje me 323 euro nëse e krahasojmë me një vit më parë. Gjatë 2020 një qytetar shqiptar ka pasur një nivel të ardhurash prej 4 mijë 459 euro ndërsa në 2019 ky nivel ka qenë 4 mijë 782 euro. Sipas vlerësimeve të financave, shqetësues mbetet edhe fakti që të ardhurat në xhepat e qytetarëve gjatë këtij viti nuk parashikohet të rritet më shumë se në 2019.
Ndërkohë që rritja reale e të ardhurave për banor parashikohet të nisë vetëm në 2022. Konsumi privat parashikohet të nxitet kryesisht nga përmirësimi i besimit të konsumatorit, si dhe nga përmirësimet në tregun e punës. Dy sektorët që parashikohet të japin kontribut kryesor në rimëkëmbjen e ekonomisë do të jenë industria ,shërbimet dhe më pas ndërtimi ndërkohë që impakti i sektorit bujqësor parashikohet të jetë i vogël.
Pas recensionit të fortë në vitin 2020, aktualisht i parashikuar në -4.4 për qind, ekonomia pritet të rikuperohet në vitin 2021. Rritja ekonomike sipas ministrisë së financave parashikohet në 5.5 për qind në vitin 2021 dhe parashikohet mesatarisht rreth 4.4 për qind në vit përgjatë periudhës afatmesme në vijim 2022–2024. Pandemia rrënoi edhe të ardhurat në buxhetin e shtetit.Referuar të dhënave të ardhurat për vitin 2020 ishin 3.4 miliardë euro, nga 4.1 miliardë euro që u planifikuan në ligjin fillestar për buxhetin e shtetit, me një rënie prej më shumë se 689.5 milionë euro.
Të ardhurat për banor në vit:
2018 4.472 euro
2019 4.782 euro
2020 4.459 euro
2021 4.782 euro
2022 5.137 euro
Rritja ekonomike:
2020 -4.4%
2021 5.5%
2022 4.8 %
2023 4.5%
