Nga Aulon Kalaja
Me kohë ka nisur fushata elektorale. Nuk e kam fjalën këtu per zyrat elektorale me ngjyrat e rënda, që po mbijnë si kërpudhat pas shiut, por për strategjinë konkrete të kontrollit dhe kapjse së votës. Në disa prej shkollave të mesme të vendit tonë po krijohen klasa pilot.
Të quajtur gjoja ekselentë, fëmijë të familjeve tradicionalisht të majta, apo maturantë të rekrutuar rishtas, me kushtin që të votojnë “Rilindjen” në zgjedhjet Parlamentare, iu është premtuar që do të vlerësohen me nota të larta në provimet e maturës, për të kapur shkollën e lartë.
Nga Dibra vijnë lajme të tjera. Në një nga shkollat e mesme atje, drejtori vetë, pret e përcjellë maturantët në zyrën e tij. Duke i kërkuar informacion për familjarët dhe farefisin se ku do e hedhin votën. Ndër të tjera ai iu premton edhe eksursione, por edhe trajtim të vecantë në provime, kopje ndihma, për ata që e sjellin votën me video për mazhorancën qeverisëse.
Nëse kërkon të ndryshosh vendbanim, menjëherë të vjen në ndihmë Bashkia e Tiranës, personat përgjegjës të së cilës të drejtojnë pyetjen krejt pa ngurim, madje si një pjesë intëgrale të gjoja një formulari, “Për kë do të votoni në zgjedhje?!”
Ndërkohë në zyrat e punës, po presin për ju rreth 33.000 vëndë të reja pune. Por nëse regjistrohesh aty si i papunë, një vajzë e bukur me shall të kuq, të pyet si me stil, se për kë do të votosh kësaj radhe. Trullosesh, sepse të duket vetja si një i pyetur nga kompanitë e sondazheve. Por gjithcka bëhet me stil, prandaj është e bukur dhe qesharake.
Nëse keni gjoba të papaguara, kamata, apo gjera të kësaj natyre, mos u nxitoni t’i paguani, sepse do amnistohen. Qeveria do të tregohet shume bujare në këtë kohë para-fushate dhe fushate. Loja shtrëngo-lësho po jep shenjat e para, lum ai ose ajo që do e shijojë. Nëse nuk keni paguar energjinë elektrike, ose e vjedh pak atë, nuk do të shkoni në burg, as nuk do ju vendoset kamata, do të ndodhë bash si në zgjedhjet e pjesshme për Bashkinë Dibër, do ju falen, ose do bëhet një sy qorr dhe një vesh shurdh. Tatimet, taksat, pagesat do të marin një tjetër kuptim në këtë para-fushatë dhe fushatë, atë kuptim që as nuk e keni menduar ndonjeherë.
Ju mund të jeni fatndriturit dhe mund të përjetoni mrekullinë. Pra mos u habitni, nëse mund të futeni në punë. Mund të punoni kudo, pa problem do të jetë arsimi dhe kualifikimi. Hapni llogarinë bankare dhe aty do jetë paga. Por kjo punë do të zgjasë vetëm tre muaj, sepse pastaj do të mbyllet si vend, për shkak të organikës së re. Pse nuk ndodhi kështu në Dibër dhe Ersekë?! Dhe ajo pjesë tjetër e shoqërisë që ka vendosur në dyshim aftësitë e veta për të punuar nga thënia monumentale e Kryeministrit “Punë ka, por nuk ka profesionistë”, do të vërtetojë se Kryeministri ka pasur dhe ka të drejtë.
Për hashashin e dini vetë. Mbill sa të duash dhe ku të duash, paguaj 30 euro për rrënjë, kur t’a mbjellësh, jo kur t’a korrësh. Përvec njerëzve të armatosur që ruajnë parcelat jeshile, do të keni edhe policinë që ju mbron, nga hajdutët, kamerat dhe opozita. Qeveria ju ofron edhe mjete për të bërë trafikun, sic është avioni, por nuk ju jep garanci nëse bie si në Divjakë ose Ishëm. Nëse nuk këni siguri në rrugët ajrore, përdorni detin me skafet e shpejta. Nëse nuk ju pëlqen as kjo, përdorni fugonat, sepse patrullat e policise nuk e kanë mëndjen kur ju të kaloni. Nëse as kjo mënyrë nuk ju duket atraktive, o burra me mushka… Ja pra që ia arritëm ditës, që policët që kanë përfunduar Akademinë e Rendit dhe një sërë specializimesh, kursesh e trainimesh, as që iu hyjnë në punë! Mjafton të dijnë të përdorin spatën, sakicën, hanxharin dhe kosën, sepse policët e sotëm meren kryesisht me korrjen e hashashit. Kuptohet të atyre parcelave, që nuk zbatojnë rregullat e lojes të vendosura nga Ministria e Punëve të Brëndëshme, ose për ata që e kanë tepruar.
Gojët e liga thonë se nga bankat e nivelit të dytë në Shqipëri, së fundmi janë tërhequr rreth 80 milion dollarë. E këtu nuk po flas për votën që do blihet, sepse ende jemi në para-fushatë. Loja ende nuk është nxehur, pasi planet po i prish cadra. Ajo cadër e mallkuar, e cila kërkon që këto skenare të mos zbatohen dhe të marin fund një herë e përgjithmonë.
