Me urdhër të drejtorit të Përgjithshëm, Haki Çako, është shkarkuar nga detyra drejtori i Laboratorit të Policisë Shkencore, Dritan Zoto. Ky shkarkim vjen vetëm pak ditë, pasi kreu i Policisë së Shtetit zyrtarizoi ndryshimin e thuajse të gjithë drejtuesve të strukturave të policisë në vend, në qendër dhe në qarqe.
Në vazhdim të këtyre ndryshimeve mësohet se është firmosur edhe shkarkimi i drejtorit të Institutit të Policisë Shkencore, Dritan Zoto.
Kreu i Policisë i ka komunikuar Dritan Zotos urdhrin e shkarkimit në zyrën e tij. Zoto ka këmbyer funksionin me Xhevahir Çeloaliajn në Institutin e Policisë Shkencore.
Ky i fundit më parë ka kryer detyra të ndryshme në Institutin e Policisë Shkencore ndërsa tashmë kryente detyrën e shefit të sektorit të menaxhimit të pajisjeve laboratorike në të njëjtin Institut.
Mësohet se pas largimit nga drejtimi i Laboratorit të Policisë Shkencore, Dritan Zoto ka këmbyer funksionin e punës me ekspertin Xhevahir Çeloaliaj, që është emëruar drejtues i ri i Institutit të Policisë Shkencore.
Deri tani, Çeloaliaj ka mbajtur detyrën e “menaxhimit të pajisjeve laboratorike” në institucionin që tashmë do të drejtojë.
Shkarkimi i kreut të Policisë Shkencore vjen në një moment kur, laboratorët e Institutit janë të mbingarkuar me ekzaminime të sasive të lëndëve narkotike të kapura në të gjithë vendin.
Kjo pasi në laboratorët e Institutit të Policisë Shkencore tij, duhet të kryhen ekzaminimet kimike dhe të gjurmëve të të gjithë sasive dhe pakove të kapura në të gjithë vendin. Kjo situatë ka bërë që ambientet dhe të gjitha hapësirat e laboratorit të pushtohen nga lënda narkotike.
Vetëm pak ditë më parë Prokurori i Përgjithshëm akuzoi publikisht Policinë për mungesë transparence në lidhje me asgjësimin e sasive të drogës që kapen rast pas rasti.
Sipas kryeprokurorit, asgjësimi i drogës është bërë pa praninë e prokurorëve në shkelje të kritereve ligjore. Ministri i Brendshëm në një letër publike i kërkoi prokurorisë evidentimin e rasteve konkrete.
