Kryetari i Partisë Demokracia Sociale, Paskal Milo ka ngritur shqetësimin e tij krerët e dy partive më të mëdha në vend, PD dhe PS, mund të takohen sërish dhe të arrijnë ndonjë tjetër marrëveshje.
Në emisionin “Studio e hapur” me gazetaren Eni Vasili në studion e “News24”, Milo tha se pas marrëveshjes së parë në dëm të partive të vogla, ekziston mundësia që, sipas tij, Rama e Basha të avancojnë me shumë në këtë drejtim.
“Çfarë garancie kemi ne që në një natë tjetër, para 25 qershorit, ata nuk takohen fshehurazi dhe të bëjnë ca rregulla apo ca veprime të tjera. E dëgjova mbrëmë me vëmendje Ramën, dhe ai la të kuptohet se pas zgjedhjeve do bëjnë ndryshime të tilla në emër të reformës zgjedhore, saqë do të vendosin monopolin e partive të mëdha. E kanë edhe tani, por do ta bëjnë edhe më tej”, u shpreh kreu i PDS, Paskal Milo.
Sakaq, ai ka sqaruar se marrëveshja e tij me kreun e LSI, Petrit Vasili, ishte një përpjekje për të shpëtuar partitë e vogla nga kjo situatë.
