Rreth 300 familje në Dukagjin nga Mali i Shoshit deri në Qafë Thorë janë izoluar totalisht nga dëbora dhe prej pesë ditësh janë pa energji elektrike.
Të dy rrugët që lidhin Shkodrën me Dukagjinin janë bllokuar.
Aksi Qafë Thorë-Theth ka rreth 60 cm borë dhe nuk mund të kalohet as me makina me zinxhir, dhe as në këmbë. Edhe aksi Breg Lumi- Mali Shoshit ka rreth 40 cm bora dhe rruga është e bllokuar.
Prej 5 ditësh, banorët janë pa energji elektrike pasi kanali që furnizon me ujë hidrocentralin e fshatit Ndërlysë, nga i cili marrin energji edhe fshatrat e tjerë, është bllokuar.
Kërkohen mjete për zhbllokimin e rrugëve dhe kanalit të HEC-it, por deri tani asnjë mjet nuk është dërguar në asnjërën prej rrugëve të Dukagjinit dhe banorët nuk dihet se për sa kohë do të qëndrojnë totalisht të izoluar.
Ata bëjnë thirrje për ndihmë sepse ndodhen në kushte të vështira duke qenë se nuk ka as mjek. Situata është alarmante dhe kërkohet ndërhyrja urgjente e institucioneve./opinion.al
