Policia e Tiranës ka arrestuar këtë të enjte ndërtuesin Namik Pelivani. Ai ka qenë i shpallur në kërkim, pasi është dënuar me vendim gjykate.
Ndërtuesi Pelivani akuzohet për mashtrim.
SHKRIMI PËR ARRESTIMIN NË VITIN 2015
Policia e Tiranës arrestoi ndërtuesin Namik Pelivani pas kallëzimit nga disa banorë të Unazës së Re me pretendimin se janë mashtruar nga biznesmeni prej 6 vitesh.
Sipas kallëzimit, që ata kanë bërë në Komisariatin nr.6, Pelivani u ka premtuar disa banorëve se pas prishjes së banesave të tyre private për ndërtimin e pallatit nga firma e tij, do t’i jepte atyre apartamente në këtë pallat.
Ndërsa së fundi kishte ndryshuar mendim, duke mos e njohur kontratën noteriale të nënshkruar në vitin 2009. Sipas tij kompensimi nuk do të kryhej në atë pallat, por në godina të tjera që ende nuk kishin nisur të ndërtoheshin.
Policia e Tiranës tha zyrtarisht se kishte filluar procedimi penal për 62-vjeçarin Namik Pelivani, pronar i një firme private, pasi dyshohet se nuk u njeh kontratat noteriale të lidhur në vitin 2009, për dhënien e truallit për ndërtim ku kanë pasur shtëpitë në proces legalizimi, shtetasit L.R., D.L., E.P. e K.L., banues ne rrugen “Teodor Keko”.
Pallati për të cilin janë ngritur herë pas here pretendime nga banorët, ndodhet në zonën e Unazës së Re, ndërsa banorët e mashtruar nga Pelevani kanë kërcënuar disa herë se do të hidheshin nga pallati nëse nuk i jepej shtëpia e premtuar. Konflikti mes tyre ka nisur prej vitit 2012.
PROTESTAT
Dhjetë gra hynë në grevë urie në ambientet e pallatit ku prisnin të merrnin apartamente, për shkak të konfliktit që kanë me pronarin e firmës së ndërtimit. Burime nga Policia e Tiranës thanë se bëhet fjalë për 17 familje, të cilat kanë dhënë shtëpitë e tyre për të ndërtuar një pallat në zonën Unazës së Re në kryeqytet, në këmbim të marrjes së sipërfaqeve të banimit, sipas një kontrate të nënshkruar me kompaninë e ndërtimit.
Por, për aq kohë sa pallati ka qenë në ndërtim, sipas një kontrate noteriale, pronari i firmës së ndërtimit, Namik Pelivani, u ka paguar qiranë banorëve për të jetuar diku tjetër. Megjithatë prej 4 vitesh, ai ka ndërprerë pagesën për qiranë dhe kur pritet të përfundojë së ndërtuari pallati, u ka komunikuar se nuk do të marrin shtëpi në këtë objekt, por kur të ndërtojë objekte të tjerë.
“Ne kërkojmë ndihmë nga shteti. Kemi 6 vjet që vijmë vërdallë, ndërsa zotëria nuk na paguan asgjë dhe kemi mbetur në mes të 4 rrugëve”, janë shprehur para mediave disa prej grave që hynë në grevë të hënën. KONFLIKTI NE 2012 Konflikti i parë mes banorëve të Unazës së Re dhe Namik Pelivanit nisi me një protestë dhe kërcënime me vetëvrasje më 26 mars të vitit 2012. Shtatë gra kërcënuan se do të hidheshin nga tarraca e pallatit 10 katësh, ende i papërfunduar, në Unazën e Re, në Tiranë.
Dashurie, Ite e Leta Rasha, Violeta e Nirie Lila, Roza Braka dhe Melita Gjoni, kërcënonin me vetëvrasje, pasi sipas tyre shkaku ishte mosmarrja e kompensimit për shtëpitë e prishura në vitin 2009, ku tashmë ishte ndërtuar pallati 10 katësh
