Mediat serbe kanë publikuar, siç thuhet, “11 pika kyçe” të dokumentit të titulluar “Plani i mbështetjes së integrimit ndërkombëtar të Kosovës”, i cili u miratua në Washington nga vendet e QUINT-it/ Pesë -shja (SHBA, Gjermania, Franca, Britania dhe Italia).
Sipas mediave serbe, në pikat e miratuara në mënyrë të detajuar është hartuar plani i pavarësisë së plotë të Kosovës dhe ndarja e Serbisë dhe Rusisë.
Pikat kryesore e “letrës së Washingtonit”, janë sovraniteti i plotë i Kosovës dhe anëtarësimi në Kombet e Bashkuara, pastaj presioni mbi të gjitha shtetet anëtare të Bashkimit Evropian që nuk e kanë njohur Kosovën, dhe lobimi në Këshillin e Sigurimit të OKB-së që të hiqen krejtësisht, apo të mbyllen për publikun mbledhjet e rregullta të Këshillit të Sigurimit për Kosovën.
Në letër përforcohet edhe qëllimi për të shuar çdo nismë për ndarjen e Kosovës, marrja e të gjitha kompetencave të mundshme ekzekutive të Bashkësisë së Komunave Serbe, pranimi i Kosovës në Interpol, UNESCO, Këshillin e Evropës, Organizatën Botërore të Doganave, si dhe presionit ndaj vendeve të cilat mendojnë për të tërhequr njohjen e Kosovës.
Sipas medias serbe takimi i vendeve të QUINT-it u mbajt në ditën e paradës ushtarake në Moskë, kurse disa detaje të këtij plani i ka zbuluar ministri i Jashtëm serb, Ivica Daçiç, kurse disa segmente me të “vështira” kanë rrjedhur nga qarqet diplomatike.
Siç thuhet, Daçiç, ka thënë se para hartimit të planit është krijuar një trup i veçantë – Grup Punue për njohjen dhe pranimin e Kosovës në organizatat ndërkombëtare, kurse takimin e ka kryesuar Zëvendës Ndihmës Sekretari i Shtetit për Çështje Evropiane dhe Euroaziatike, Matthew Palmer, ndërsa dokumenti është hartuar në bashkëpunim me Katherine Bondi, një zyrtare në zyrën për Kosovën në Departamentin e Evropës Juglindore dhe Qendrore pranë byrosë së Departamentit të Shtetit për Çështjet e Evropës dhe Euroazisë.
Ai shpjegoi se autoritetet e Prishtinës kanë angazhuar një agjenci lobimi nga Francë, e cila udhëhiqet nga një ish-ministër i jashtëm francez, që ndihmon Kosovën të marrë më shumë njohje.
“Kemi dokumente që tregojnë se si do të votojë secili vend dhe kush do t’i ndihmojë për çdo vend. Gjermania, Austria, vendet islamike … Si do t’i ndihmojnë me rastin e votimit, nga Emiratet kërkohet edhe të paguajnë për ato vende që nuk kanë të holla për të marrë pjesë në konferencën për anëtarësim në Interpol, e cila do të mbahet në Emiratet e Bashkuara Arabe në fund të këtij viti, në mënyrë që të votojnë për pranimin e Kosovës. Perëndimi po e nxit Prishtinën të mos pranojë negociata të tjera, përveç pavarësisë”, tha Daçiç.
Sipas mediave serbe, Daçiç ka thënë vetëm një pjesë të asaj që Perëndimi po përgatit dhe çfarë është rënë dakord në takimin e Washingtonit, i cili është dashur të mbetet sekret, por që, sipas tij, u zbulua nga mediat e Prishtinës.
360grade.al
