Pasi rezistuan për më shumë se 12 orë pa ujë dhe pa ushqime në temperatura të larta, grupit të artistëve, iu janë bashkuar rreh orës 21:30 edhe qytetarët protestues.
Gjatë pasdites ka patur disa përplasje mes policisë dhe protestuesve, që janë në mbrojtje të Teatrit Kombëtar.
Në mbrëmje vonë më pas policia u tërhoq, ndërsa duke rrethuar gjithë godinën nuk lejonin as futjen e ujit dhe ushqimeve. Protestuesit u futën brenda godinës, ndërsa nuk munguan thirrjet: Fitore; Poshtë Diktatura.
Situata ka qenë e tensionuar që prej paradites, ku artistë dhe përfaqësues të opozitës kanë qëndruar aty pasi kanë marrë njoftim se ambientet e Teatrit po zbrazeshin. Bashkia e Tiranës ndërkohë ka konfirmuar se shembja e godinës nuk do të bëhej gjatë ditës së sotme.
Debati për Teatrin ka nisur që prej fillimit të vitit të shkuar, kur qeveria bëri të njohur projektin për shembjen e tij dhë ndërtimin e një godine të re, pas së cilës qëndron një projekt i paracaktuar për një kompleks ndërtimesh shumëkatëshe që do të ngrihen nga kompania private “Fusha”. Qeveria ka këmbëngulur gjatë gjithë kohës se projekti ka qenë një ofertë e pa kërkuar e kompanisë “Fusha”, me pretendimin se ajo ka një pjesë të pronësisë mbi truallin, ndonëse jo më shumë se tre përqind.
Por faktet kanë dëshmuar se ajo ka qenë një ofertë e koordinuar më parë me qeverinë e cila fillimisht paraqiti një ligj të posaçëm i cili u kritikua dhe nga Komisioni europian, për shkak se projekti shmangte një garë të hapur.
Socialistët bënë më pas ndryshime në ligj, duke vendosur hapjen e një gare, por e gjitha duket të jetë vetëm në letër, pasi asnjë konkurrent tjetër nuk plotëson të paktën kushtin që të marrë miratimin e të gjithë pronarëve të truallit, pasi i duhet të marrë leje dhe nga kompania Fusha./ Opinion.al
