Shtetet e Bashkuara dhe pesë vende evropiane i kërkuan Moskës që të tërheqë forcat e saj ushtarake në pozicionet e mbajtura në Gjeorgji, në 11 vjetorin e luftës pesë-ditore midis Rusisë dhe Gjeorgjisë,
Përmes një deklarate të përbashkët, ambasadorët e Shteteve të Bashkuara, Belgjikës, Estonisë, Francës, Gjermanisë, Polonisë dhe Britanisë, në OKB, shprehën mbështetje për pavarësinë, sovranitetin dhe integritetin territorial të Gjeorgjisë.
Deklarata u lëshua pas një seance të mbyllur të Këshillit të Sigurimit të Kombeve të Bashkuara.
“Ne nuk do të ndalemi së punuari derisa Rusia të përfundojë pushtimin e territorit sovran Gjeorgjian”, thuhet në deklaratë.
Përmes një deklarate të veçantë, Departamenti amerikan i Shtetit i kërkoi Rusisë të revokojë njohjen e “të ashtuquajturës pavarësi” të dy rajoneve të shkëputura nga Gjeorgjia, Abhazisë dhe Osetisë së Jugut.
Më 2002, Kremlini filloi dhënien e nënshtetësisë ruse për banorët e rajoneve Abhazi dhe Oseti e Jugut, një politikë që ndihmoi në rritjen e numrit të mbajtësve të pasaportave ruse atje, nga rreth 20 përqind në më shumë se 85 përqind të popullsisë.
Më pas kur Rusia filloi luftën kundër Gjeorgjisë në gusht të vitit 2008, Kremlini justifikoi vendosjen e forcave ushtarake ruse në Abhazi dhe Osetinë e Jugut duke thënë se ato forca ishin të nevojshme për të mbrojtur qytetarët e Rusisë në rajonet separatiste./Opinion.al
