“KÇK është organizatë kriminale, me gjykatë dhe prokurorë që janë shërbëtorë, bashkëpunëtorë edhe dhe tutorë të krimit të organizuar. Janë një kancer në sistem që me fillimin e vettingut ka hyrë në fazën e vetë më agresive. Janë njerëz që e dinë që nuk kanë shans ta kalojnë vettingun, sot po shfaqen më hapur se sa deri më dje. Sot ata nuk e kanë më jetën përpara në kuptimin e karrierës, por kanë vetëm kohën e mbetur deri sa të dalin në Vetting. Prandaj motoja e tyre, e thotë ata është kap ça të kapësh”.
Kështu deklaroi kryeministri Edi Rama në prezantimin e paketës Speciale Anti-KÇK. Por Rama duke marrë shembuj konkret, mori përsipër të bëjë edhe punën prokurorit apo dhe të gjykatësit.
“Rasti i Durrësit është një rast shumë flagrant. Për fat të mirë e solli rastësia, që u gjendën në një makinë prokurori dhe një nga eksponentët e krimit të organizuar dhe në bagazhin e makinës dokumentet e vjedhur të prokurorisë. Ato që për një kohë të gjatë i vendoseshin nga fronti kundër reformës në drejtësi në kurriz Donika Prelës. Ndërkohë u gjendën në atë… Tani çfarë duhet të bëjmë ne këtu, duhet të rrimë të presim vettingun. Për shkak të faktit se kriminelët kanë shpatullat e ngrohta kanë një mungesë ekstreme kujdesi për të fshehur gjurmët”, tha Rama, për prokurorin e Durrësit, Arjan Ndoja, të cilit iu bë atentat.
Po ashtu në media dolën zëra se në makinën e tij ishin gjetur dokumente të vjedhura nga prokuroria e Durrësit, por as organi i akuzës as policia deri tani nuk e ka konfirmuar këtë detaj. Megjithatë e bëri kryeministri Rama këtë të hënë.
Rama pranoi edhe situatën e rëndë në hipotekën e Vlorës.
“Një kriminel merr peng hipotekën e Vlorës dhe policia nuk arrin dot të veprojë, për shkak se gjykatat prokuroria nuk veprojnë”, tha kryeministrin./ Opinion.al
