Home KRYESORE Izraeli iu dhuron palestinezëve 5 mijë vaksina kundër COVID-19

Izraeli iu dhuron palestinezëve 5 mijë vaksina kundër COVID-19

Izraeli do të transferojë 5,000 vaksina kundër koronavirusit tek Autoritetet Palestineze, që të vaksinojnë stafin mjekësor që është në vijën e parë të betejës me pandeminë.

“Dërgesa e parë pritet të transferohet në fillim të javës së ardhshme”, tha të dielën Ministria izraelite e Mbrojtjes. Në njoftimin për media të ministrisë, nuk u bën të ditura detaje të tjera.

Kritikët palestinezë i kanë bërë thirrje Autoritetit Palestinez – që ka nën kontroll disa pjesë të Bregut Perëndimor – që të mos pranojë vaksina nga Izraeli, nëse i ofrohen.

Ata thonë se Izraeli ka ofruar që të japë vaksina për palestinezët, pasi komuniteti ndërkombëtarë e kritikoi atë për një gjë të tillë. Kritikët kanë thënë se Autoriteti Palestinez nuk duhet t’i pranojë vaksinat nga Izraeli, por të presë dërgesat e vaksinës ruse, që pritet të vijnë javën e ardhshme.

Autoriteti Palestinez ka miratuar më 11 janar përdorimin e vaksinës Sputnik-V të prodhuar nga Rusia. Përveç vaksinave ruse, Autoriteti Palestinez pritet të marrë doza të vaksinës edhe përmes Organizatës Botërore të Shëndetësisë.

Autoriteti Palestinez zyrtarisht asnjëherë nuk ka kërkuar nga Izraeli që t’i japë doza të vaksinës. Izraeli argumenton se në bazë të marrëveshjeve të paqes, të nënshkruara në vitet e 90-ta, Autoriteti Palestinez mban përgjegjësinë për shëndetin e palestinezëve, që jetojnë në zonat që ai kontrollon.

Së fundmi, grupi për të drejtat e njeriut, Amnesty International i bëri thirrje Izraelit që të përmbushë “zotimet ndërkombëtare si fuqi pushtuese” dhe të sigurohet që palestinezët në Bregun Perëndimor dhe në Rripin e Gazës të merren në konsideratë, sa i përket shpërndarjes së vaksinave kundër koronavirusit.

Share: