Media britanike “The Sun” ka publikuar një investigim që lidhet me kontrabandistët, të cilët përdorin Tik Tok për të reklamuar biznesin, sesi mund të kalohet nga Franca për në Britani.
The Sun ka zbuluar llogari të shumta nga shqiptarët që shesin kalim “të sigurt” me varkë të vogël apo edhe jahte luksoze, plus këshilla se si të procedojnë me sistemin e azilit.
“Duke i ofruar hetuesit tonë të fshehtë një vend prej 4500 paund në një gomone, një mashtrues u mburr: “Francezët nuk do t’ju ndalojnë. Përkundrazi, ata do t’ju shoqërojnë të sigurt derisa të arrini në kufirin ujor të Mbretërisë së Bashkuar”, shkruan media britanike.
“Gazetarit tonë – i paraqitur si një emigrant shqiptar – iu tha më pas të kontaktonte një avokat pas mbërritjes në Britani, i cili “mund t’ju ndihmojë të formuloni një histori të mirë”.
Kontrabandisti shtoi në bisedën TikTok : “Mund t’ju jap numra avokatësh që kam përdorur për të afërmit e mi. Ata kanë arritur të sigurojnë dokumentacion (leje qëndrimi) për gjysmën e shqiptarëve në Londër”.
I pyetur për fatin e të ardhurve të fundit, ai tha: “Tre muaj më parë një djalë u mbajt në paraburgim për një muaj, pastaj u lirua nga avokati i tij.
“Të gjithë të tjerët me të cilët kam biseduar pasi mbërritën u dërguan në hotele, më pas u zhdukën. Ata shkuan te të afërmit e tyre.”
Kontrabandisti — pseudonimi në Tik Tok i të cilit është @franc_gomone_angli1 — po fiton para nga një valë shqiptarësh që shkojnë në MB, shkruan The Sun.
Në vitin 2021, gjithsej 757 shqiptarë kaluan Kanalin me anije të vogla . Në vetëm gjashtë javë këtë verë, 1,075 shqiptarë kaluan – gati 40 për qind e të gjithë atyre që arritën në Britani në këtë mënyrë, thotë një raport ushtarak i zbuluar.
Ndërkohë që Shqipëria anëtare e NATO -s është e goditur nga varfëria, ajo nuk ka qenë në luftë për 25 vjet.
Ish-udhëheqësi i konservatorëve, Iain Duncan Smith tha se fluksi i klandestinëve dëshmoi se njerëzit po vinin jo për të ikur nga lufta, por “me një biletë migrimi ekonomik” dhe po abuzonin me sistemin e azilit.
Edhe ish -shefi i Forcave Kufitare Tony Smith këmbënguli se kishte prova që shqiptarët këshilloheshin nga kontrabandistët të pretendonin se ishin viktima të trafikimit dhe jo azilkërkues, duke e bërë përpjekjen e tyre për të qëndruar më shumë gjasa për të pasur sukses.
360grade.al
