Sinodi i Shenjtë i Ipeshkvijve të Kishës Serbe ka mbajtur qëndrim zyrtar për incidentin tragjik, sulmin që ndodhi në manastirin e Banjskës të dielën në veri të Kosovës. Si pasojë mbetën të vrarë tre serbë dhe një polic kosovar.
Sulmi i së dielës shënon përshkallëzim serioz në Kosovë pas muajsh tensionesh në rritje me Serbinë.
Sinodi i Shenjtë i Kishës Serbe në një njoftim të publikuar ka theksuar qëndrimin zyrtar që ka mbajtur për çështjen e Kosovës dhe ka hedhur poshtë të gjitha pretendimet për ndërhyrjen e saj në ngjarje.
“Kujtojmë se Kisha Ortodokse Serbe gjithmonë ka mbrojtur, sikurse edhe tani, që keqkuptimet në Kosovë dhe Metohi të zgjidhen në mënyrë paqësore dhe përmes dialogut, në mënyrë që të arrihet një bashkëjetesë paqësore e serbëve, shqiptarëve dhe të gjithë popujve të tjerë që jetojnë në këtë zonë. ” shkruhet në deklaratë.
“Megjithatë, me keqardhje vërejmë se shumë njerëz nga Prishtina dhe bota, por edhe nga Beogradi, me ideologji të ndryshme, po përpiqen ta paraqesin Kishën Ortodokse Serbe si pjesëmarrëse, edhe në fajtorët, konfliktet dhe ngjarjet tragjike. Qëllimi i atyre që duan ta tërheqin Kishën në konflikte tragjike me çdo kusht është të dëbojnë Kishën Serbe dhe besimtarët e saj nga Kosova e Metohia”, theksojnë ata në njoftim.
“Sulme të panumërta janë kryer mbi faltoret tona, mbi popullin tonë, madje edhe mbi fëmijët serbë. Muajt e fundit janë arrestuar persona pa asnjë provë apo në bazë të provave të fabrikuara”, shtuan ata.
Dhe në fund, ata shprehin mbështetjen për vazhdimin e dialogut për arritjen e paqes:
“Ne theksojmë se për Kishën Ortodokse Serbe, Kosova dhe Metohia janë pjesë e pandashme e shtetit të Serbisë. Ne mbështesim dhe inkurajojmë vazhdimin e dialogut paqësor me qëllim arritjen e paqes dhe zgjidhjen e çështjeve jetike për të gjithë ata që jetojnë në provincë.”
Top Channel
