Kryeministri Rama përmes një postimi në platformën X është shprehur se është e rëndësishme që luftës në Rripin e Gazës t’i jepet fund, përpara se ky konflikt të dalë jashtë kontrollit.
Ndërsa sot mbushet një muaj nga sulmi i Hamasit në Izrael, Rama shkruan se Shqipëria mbështet thirrjen e presidentit Biden për një armëpushim urgjent.
“Ndërsa qëndrojmë me vendosmëri me Izraelin kundër Hamasit, ne jemi gjithashtu shumë të shqetësuar për vuajtjet e civilëve dhe shkatërrimin në Gaza. Është thelbësore t’i jepet fund këtij konflikti përpara se ai të përshkallëzohet më tej dhe të dalë jashtë kontrollit. Shqipëria mbështet thirrjen e Presidentit Biden për një pauzë humanitare në armiqësitë. Në këmbim të një armëpushimi të menjëhershëm, Liga Arabe dhe Turqia duhet të sigurojnë lirimin e pakushtëzuar dhe të sigurt të të gjithë pengjeve të mbajtura nga Hamasi. Pas krimeve të tmerrshme të kryera më 7 tetor, nuk mund të ketë të ardhme politike për Hamasin. Sipas një mandati të OKB-së, një forcë ndërkombëtare e udhëhequr nga Liga Arabe mund të marrë përkohësisht kontrollin e Gazës, duke lehtësuar një kalim të përgjegjësive qeverisëse nga Hamasi te Autoriteti Palestinez. Së shpejti do të bashkohem me liderët e tjerë botërorë në Forumin e Paqes në Paris, ku do të diskutojmë mënyrat për rivendosjen e paqes në Lindjen e Mesme”, shkruan Rama.
Më shumë se 10,000 njerëz janë vrarë në Gaza që kur Izraeli nisi ofensivën e tij ushtarake një muaj më parë, sipas Ministrisë palestineze të Shëndetësisë në Ramallah.
Izraeli i shpalli luftë Hamasit pasi grupi militant islamik filloi një sulm brutal më 7 tetor, duke vrarë 1,400 në Izrael dhe duke rrëmbyer më shumë se 240 të tjerë.
Top Channel
