Deputetja e Partisë Socialiste, Blerina Gjylameti është zgjedhur zëvendës Presidente e Asamblesë Parlamentare të Këshillit të Evropës.
Lajmin e ka bërë të ditur vetë deputetja e PS, e cila me anë të një postimi në rrjetet sociale shprehet se ndihet e vlerësuar për këtë pozicion që i kanë dhënë.
Gjylameti shprehet se së bashku me delegacionin e Shqipërisë do të vijojnë angazhimet për forcimin e vlerave demokratike si dhe për të cuar përpara agjendën e anëtarësimit të Kosovës në KiE.
“E vlerësuar për besimin e kolegëve deputetë në Asamblenë Parlamentare të Këshillit të Evropës në zgjedhjen time unanimisht si Zëvendës Presidente e Asamblesë!
Ky post i rëndësishëm është një tjetër konfirmim i besimit dhe vlerësimit që gëzon Shqipëria sot në arenën ndërkombëtare për të kontribuar në konsolidimin e demokracisë, të drejtave të njeriut dhe shtetit të së drejtës!
Me marrjen e kësaj detyre te lartë në Asamblenë Parlamentare të Këshillit të Evropës, ku ulen delegacionet kombëtare të 46 vendeve anëtare të kontinentit tonë, së bashku me delegacionin e Shqipërisë do të vijojmë angazhimet për forcimin e vlerave demokratike si dhe për të cuar përpara agjendën e anëtarësimit të Kosovës në KiE”, shkruan Gjylamenti.
360grade.al
