Presidenti i Ukrainës, Volodymyr Zelenskyy ka konfirmuar praninë e rreth 11 mijë ushtarëve koreano-veriorë në rajonin e Kurskut. Informacioni i Zelensky-t bazohet në gjetjet e shërbimeve sekrete ukrainase. Kievi pretendon se ushtarët e Koresë së Veriut së shpejti do të vendosen në anën e Rusisë në luftën kundër Ukrainës.
“Ka pasur gjithashtu një raport të veçantë sot nga Drejtoria kryesore e Inteligjencës dhe Shërbimi i Inteligjencës së Jashtme në lidhje me personelin ushtarak të Koresë së Veriut në Rusi – tashmë 11 mijë në rajonin e Kurskut. Ne shohim një rritje të Koresë së Veriut, por, për fat të keq, nuk kemi shohim një reagim të shtuar nga partnerët tanë”, tha presidenti i Ukrainës.
Zelensky megjithatë e përshkroi përparimin ukrainas në Kursk, i cili filloi në gusht, si një sukses. Një “zonë mbrojtëse” u krijua përgjatë kufirit ruso-ukrainas dhe u morën të burgosur të rinj rusë për një shkëmbim të mundshëm në të ardhmen, theksoi Zelenskyy.
Sipas vëzhguesve, ushtria ukrainase po pëson humbje në rritje të njerëzve dhe materialeve në zonën e operacioneve në territorin rus. Ndërkohë zyrtarët e Pentagonit nuk mund të theksojnë qartë nëse ushtria e Koresë së Veriut do të përfshihet në luftime në Kursk.
“Ne besojmë se tani ka të paktën 10 mijë forca të Koresë së Veriut në rajonin e Kurskut, duke pranuar se këto shifra mund të rriten paksa për sa i përket numrit total të tyre në Rusi. Ne i kemi parë raportet e shtypit në lidhje me operacionet e supozuara luftarake, por në këtë pikë nuk mund t’i vërtetojmë ato raporte”, tha zëdhënësi i Pentagonit, gjeneral major, Pat Ryder.
Ushtria ukrainase tha se ka rrëzuar 48 nga 79 dronë dhe dy raketa të lëshuara nga Rusia. Forcat ajrore thanë se orientimi 30 dronëve të tjerë ishte humbur, ndërsa një tjetër ishte kthyer në Rusi. Një sulm gjatë natës të së hënës duke përdorur bomba ajrore të drejtuara në qytetin lindor të Kharkivit gjithashtu plagosi dy persona dhe dëmtoi dritaret në tre ndërtesa apartamentesh, tha guvernatori rajonal Oleh Syniehubov përmes aplikacionit të mesazheve Telegram.
360grade.al
