Rritja ekonomike do të ngadalësohet vitin e ardhshëm thotë Banka Botërore.
Në raportin e saj të përvitshëm, institucioni evidenton se rritja do jetë në nivelin 3.2% në dy vitet e ardhshëm, ulje me 0.4% nga niveli i këtij viti. Burim i rritjes do jenë konsumi dhe investimet.
Ekonomia në indikatorët e saj kryesorë po performon mirë. Të ardhurat, punësimi dhe kreditimi u rritën. Nga krahu tjetër kjo ka sjellë uljen e varfërisë në nivelin 23.9%. Por, ekspertët e Bankës Botërore bënë thirrje që gratë të përfshihen më shumë në tregun e punës.
“Pjesëmarrja më e ulët e grave në tregun e punës nuk po lejon që varfëria të ulet në masën e duhur dhe të arrijë parametrat e dëshiruar”, tha Natasha Rovo, ekonomiste e lartë e Bankës Botërore.
Banka Botërore në raportin e këtij viti vëmendje të veçantë i kushtoi bujqësisë. Për Shqipërinë, ky sektor ka kontributin më të lartë në krahasim me vendet e rajonit. Institucioni ndërkombëtar po asiston Ministrinë e Bujqësisë në një plan për rritjen e produktivitetit
“Meqenëse sektori i bujqësisë në Ballkanin Perëndimor po kalon një transformim të madh strukturor, përpjekjet për bujqësinë e gjelbër janë gjithashtu të rëndësishme për të siguruar akses në tregun e BE-së dhe për konkurrencën e bujqësisë, zhvillimin rural dhe sigurinë ushqimore. Kriza energjetike ka nxjerrë në pah nevojën për të përshpejtuar tranzicionin e gjelbër në të gjithë Evropën, duke përfshirë Ballkanin Perëndimor, dhe me fokus në sektorët kyç, si bujqësia”, shtoi ekonomistja.
Banka Botërore evidentoi krizën e kostos së jetesës dhe ndryshimet klimatike, si dy rreziqe themelore për ekonominë tonë. Inflacioni nga krahu tjetër mbetet ende një rrezik konstant, ndërsa mungesa e krahut të punës po rrit me shpejtësi pagat dhe kostot e bizneseve. Ashtu si FMN, Banka Botërore parashikon që çmimet të kthehen në objektiv në 2025-ën.
Top Channel
