Behet me dije se rreth 1352 emigrantë shqiptarë të cilët prej kohësh jetojnë në Greqi në mënyrë të paligjshme, do të dëbohen nga shteti grek. Ministria greke e Mbrojtjes së Qytetarëve ka njoftuar se prej javësh ka nisur një operacion për largimin e të gjithë qytetarëve me kombësi të ndryshme të cilët qëndrojnë ilegalisht në Greqisë.
Njoftimi ka saktësuar se një pjesë e madhe e tyre janë larguar vullnetarisht, ndërkohë që për pjesën tjetër pritet që të largohen edhe pa dëshirë e tyre. Po sipas kësaj ministrie, çdo ditë në Greqi hyjnë të paktën 400 emigrantë të paligjshëm ku numrin më të madh e kanë emigrantët që vijnë nga Shqipëria, pas të cilëve renditen qytetarët që vijnë nga Lindja e Mesme, por edhe vende të ndryshme të Evropës.
Sipas statistikave, vetëm gjatë muajit nëntor institucionet e zbatimit të ligjit në Greqi kanë kthyer në vendet e origjinës 1604 shtetas të huaj, që kishin hyrë apo qëndronin ilegalisht në Greqi, ku prej tyre pjesa me madhe kishin qenë shqiptarë.
