GazetaExpress Kosove
Një dokument tani i deklasifikuar, i mbajtur si shënim nga administrata e Clintonit, ka përshkruar në detaje takimin ndërmjet Presidentit të SHBA’ve Bill Clinton dhe Presidentit të Shqipërisë Sali Berisha në shtator të vitit 1995. Tema e Kosovës e cila atë kohë ishte e okupuar nga Serbia, është një nga çështjet kryesore në agjendën Washington ”“Tiranë.
Në këtë dokument evidentohet fakti se shteti shqiptar është i vetmi në botë që e ka njohur “Republikën e Kosovës”, por gjatë bisedave në nivel presidencial, Berisha mban një qëndrim zhgënjyes para Clintonit – angazhohet vetëm për autonomi për Kosovën, transmeton Gazeta Express.
Përveç qëndrimit shqiptar, dokumenti përmban edhe qëndrimin e Shteteve të Bashkuara që po ashtu parashikon një autonomi për Kosovën dhe respektimin e të drejtave të njeriut dhe civile për shqiptarët e Kosovës.
Por çfarë i thotë saktësisht Berisha homologut të tij amerikan për Kosovën para 20 vitesh?
“ Situata në rajon është shumë brengosëse. Kosova është nën okupim total. Unë kam folur për këtë me Sekretarin e Shtetit (Warren Christopher), dhe e kam kërkuar nga ai nëse SHBA’të mund të marrin rolin e ndërmjetësit në negociata për të rivendosur autonominë atje. Natyrisht, shqiptarët do të kërkojnë nga unë që të kërkoj më shumë. Por, unë them jo sepse po të kërkojmë më shumë kjo nënkupton luftë. Paralajmërimet e Administratës së Bushit(Paralajmërimet e Krishtlindjeve që kanë të bëjnë me Kosovën) dhe prania e trupave amerikane në Maqedoni ka qenë kyçe për preventivin e përhapjes së konfliktit të Bosnjës në jug” ka theksuar Berisha.
Ndërkohë Presidenti i SHBA’ve Bill Clinton duke u përgjigjur në këtë çështje ka thënë se Washingtoni ka pasur të drejtë kur ka vendosur trupat në IRJM (Maqedoni). Presidenti Bush e ka lëshuar paralajmërimin e tij për Kosovën dhe kjo kishte ndodhur në dhjetor pas zgjedhjeve, serbët erdhën te unë. Unë thash se kjo ka qenë një vendim i duhur. Ne po bëjmë atë që është e mundur për të ndalë luftën dhe do të vazhdojmë në përpjekjet tona” ka thënë ai./GazetaExpress/
