Pas ultimatumit të vendosur nga opozita që proteston prej më shumë se 20 ditësh, Kryetari i Kuvendit Ilir Meta thotë se palët politike duhet të dialogojnë për zhvillimin e zgjedhjeve, realizimin e reformës dhe ligjin e vettingut. Në një intervistë për Ora Neës ai shprehet se opozita duhet të japë kontributin e saj në këtë dialog, i cili duhet të qëndrojë larg ultimatumeve.
“Çështja e zgjedhjeve dhe çështja e vazhdimit të reformës dhe zbatimit të ligjit të vetingut, duhet një dialog më pro aktiv dhe bashkëpunues. Ka ardhur koha që Shqipëria ta pastrojë njëherë e mirë temën e zgjedhjeve me probleme. Kjo kërkon një dialog politik proaktiv, larg ultimatumeve” –thotë Meta.
Kryetari i Kuvendit Ilir Meta shtoi më tej se cënimi apo dështimi i zgjedhjeve do të rrezikonte stabilitetin e vendit apo edhe integrimin në BE.
“Cënimi i zgjedhjeve aq me keq dështimi i tyre do të ishtë një pengesë dramatike për të ardhmen e stabilitetit të vendit, sepse për integrimin europian nuk bëhet më fjalë”.
Ilir Meta tha se në cilësinë e kryetarit të Kuvendit është i gatshëm të kontribuojë në krijimin e urave të dialogut që do të mundësojnë zgjidhjen e problemeve.
