Kesler Mziu, nxënës i shkollës Turgut Ozal në klasën e 5-të, kryesoi listën e nxënësve të përzgjedhur për konkursin e Kangaroo, finalja e të cilit është zhvilluar ditën e shtunë në Greqi.
Ky konkurs ndërkombëtar zhvillohet një herë në vit dhe është i hapur për të gjithë nxënësit nga klasa e 3-të deri në klasën e 12-të, pra nga mosha 8-18 vjeç. Kjo ishte hera e parë që në Shqipëri u organizua olimpiada e gjuhës Angleze Kangaroo Global Linguistic (KGL).
Lajmin e mirë të fitores së Olimpiadës Kombëtare të Gjuhës Angleze në Shqipëri e ka ndarë në rrjetet sociale, i atij, kryebashkiaku Xhelal Mziu, i cili nuk kursen vlerësimet për të birin duke pohuar se është një frymëzim për atë.
“Gjithmonë jam përpjekur të jem shembull i mirë dhe frymëzim për qytetin tim Kamëz! Por, frymëzim për mua u bë im bir!” shkruante Mziu në FB.
Pas fitores në Greqi, Klubi i Medias pranë Turguit Ozal i mori një intervistë nxënësit fitues të Kangaroo Global Linguistic (KGL) për grupmoshën 10 vjeçare, Kesler Mziu, për ta pyetur mbi emocionet dhe mbresat e tij nga konkursi që zhvilloi vetëm para pak ditësh në Greqi.
Pyetje: Ky ishte hapi i parë i parë i konkursit. Po më pas si vazhdoi? Jemi kureshtarë të dimë për eksperiencën tënde në konkursin ndërkombëtar, mbresat nga ky konkurs dhe përjetimet e tua në momentin e shpalljes fitues i vendit të parë?
Kesler Mziu i përgjigjet:
“Siç e thatë edhe ju, konkursi në Tiranë ishte hapi i parë, i cili më krijoi mundësinë të isha pjesëmarrës në Greqi. Aty konkurrimi ishte më i fortë, pasi merrnin pjesë fëmijë nga vende të ndryshme si: Shqipëria, Rumania, Bullgaria, Greqia, deri dhe nga Japonia. Organizimi i konkursit në Greqi ishte shumë ndryshe nga ai i Tiranës. Ditën e parë bëmë njohjen me bashkëmoshatarët nga vendet e tjera që merrnin pjesë në konkurs. Ajo ishte dita ku të gjithë zumë shokë e shoqe të rinj, pasi kishte shumë fëmijë e të rinj nga disa shtete dhe të tërë ishin tepër miqësorë. Dita e dytë ishte e mbushur me emocionet e konkursit.
Ky konkurs u zhvillua përsëri në tre faza: Në fillim na morën në një intervistë dhe kjo ishte faza e provimit me gojë. Më pas, zhvilluam ushtrime në kompjuter dhe kjo ishte faza e dytë, ajo e gramatikës. Ndërsa faza e tretë ishte ajo e shkrimit të një letre në gjuhën angleze drejtuar një bashkëmoshatari kudo në botë.
Këtu vlerësohej jo vetëm sa saktë shkruan në gjuhën angleze, por edhe sa e bukur dhe me kuptim ishte e gjithë letra që kishe shkruar. Pasdite u ndanë çmimet dhe unë zura përsëri vendin e parë. Lumturia ime dhe e njerëzve të mi ishte shumë e madhe. Kur u thirr emri im u ndjeva krenar për familjen time, shkollën ku mësoj, por mbi të gjitha isha krenar për vendin tim”.
