Hetimi që vuri në pranga zyrtarët lokalë të Lezhës nisi pas një kallëzimi të bërë nga një person, i cili denonconte se tokat që i përkisnin atij ishin ndarë në pesë parcela dhe ishin përvetësuar nga disa të tjerë.
Nga hetimet e kryera më pas rezultoi se përvetësimi i rreth 235 mijë m2 mijë metrave katrore toke në zonën e quajtur: Rana e Hedhun’, që aktualisht ndodhet e sekuestruar nga prokuroria, është bërë nëpërmjet falsifikimit të dokumenteve dhe shpërdorimit të detyrës nga dhjetëra zyrtarë.
Më konkretisht, falsifikimi i parë është bërë duke ndryshuar zërin kadastral të tokës, nga pyjore dhe ranore që është në të vërtetë, në zonë pemtore dhe arë. Pas kësaj, toka u është dhënë në bazë të ligjit 7501, katër personave, Frrok Frrokut, Vasil e Pjetër Gjoni dhe Nikoll Tinaj, të cilët nga verifikimi i Prokurorisë rezultojnë se nuk janë fare banorë të zonës tek Rana e Hedhun, njësia administrative Mali i Rencit, por janë banorë të një njësie tjetër administrative të Lezhës dhe si të tillë nuk mund të përfitonin atë toke në bazë të ligjit 7501. Por, ata janë regjistruar si pronarë nëpërmjet falsifikimit të certifikatave të gjendjes civile.
Gjithashtu, Prokuroria ka pyetur edhe disa zyrtarë lokalë firmat e të cilëve janë në dokumentet e dhënies së tokës tre familjeve Frroku, Gjoni e Tinaj, të cilët kanë deklaruar se nuk kanë firmosur ndonjëherë për këto sipërfaqe toke.
Por rezultoi se shumë zyrtarë të tjerë, përfshi edhe drejtuesit më të lartë të bashkisë dhe këshillit të qarkut, kanë shpërdoruar detyrën dhe falsifikuar dokumente për tjetërsimin e pronësisë së kësaj sipërfaqe toke. Hetimet e kësaj çështje kanë vijuar rreth 10 muaj./opinion.al
