Hetimi i dosjes shumë të përfolur në politikën Shqiptare të audio-përgjimit të pretenduar mes Albert Veliut (Babalja) dhe Agron (Geron) Xhafaj, vëllait të ministrit të Brendshëm Fatmir Xhafaj, ka sjellë nxjerrjen në dritë të elementëve të reja mbi këtë çështje.
Një element i ri ka dalë së fundmi, provë e cila mund të kthejë përmbys të gjithë situatën e debatit politik dhe vërtetësinë e akuzave të bëra nga PD, se Agron Xhafaj drejton trafikun e drogës. Por nëse ky element do jetë i vërtetë, atëherë përgjegjësia totale do bjerë mbi kupolën drejtues të PD dhe denoncuesit publik të këtij audio-përgjimi të mistershëm.
Gjatë verifikimeve të kryera elementë të rinj kanë dalë, duke treguar një anë të erët dhe version të panjohur deri më sot, mbi atë çfarë ka ndodhur dhe vërtetësinë e këtij audio-përgjimi, që Partia Demokratike e publikoi në media, dhe trumbetoi se Agron Xhafaj vëllai i ministrit të Brendshëm drejton trafikun e drogës nga Vlora në drejtim të Italisë.
“Shqiptarja.com” mëson se në prokurorinë e Krimeve të Rënda dhe më konkretisht tek anëtarët e grupit hetimor që po heton çështjen e audio-përgjimit “Babalja-Xhafaj”, është vetëofruar një person i cili ka deklaruar para hetuesve se ai ishte personi që kishte aktruar në këtë përgjim të rregjistruar nga Babalja, apo i etiketuar nga vetë PD si dëshmitari X.
Burime pranë Krimeve të Rënda, pohuan pa bërë publik emrin e personit se ky shtetas nga qyteti i Vlorës, është vetëofruar pak ditë më parë në prokurori, duke marë autorësinë e personazhit tjetër të këtij përgjimi, që sipas tij ai ka bërë rolin e Agron Xhafaj. E habitshme por e vertetë. Pas dy muaj debate të ashpra politike, sot në derën e prokurorisë së Krimeve të Rënda ndodhet dhe një provë tjetër, që kundërshton vërtetësinë e këtij audio-përgjimi, dhe që dëshmitari i vetëofruar pretendon se gjithçka ka qënë një iskenim mes tij dhe Albert Veliut (Babalja).
Konfirmohet se dëshmitari i vetëofruar në prokurori ka njohje dhe shoqëri me dëshmitarin X, Albert Veliu, dhe të dy së bashku kanë regjistruar bisedën për një tentativë trafiku droge, ku siç ka pretenduar i vetëofruari në prokurori ai ka bërë rolin e “Agron Xhafaj” ndërsa Babalja ka aktruar në rolin e tij. “… të aktroja në audio-përgjim ma ka kërkuar Babalja, me të cilin kam njohje prej disa vitesh…”- ka pohuar dëshmitari i vetëofruar. Në këmbim të këtij shërbimi ka shumë dyshime se këtij personi i është ofruar shuma parash, por ka shumë gjasa që ky dëshmitar nuk i ka marrë asnjë lekë dhe për pasojë është paraqitur në prokurori. I vetëofruari u ka pohuar prokurorëve se: “Duke parë zhurmën e madhe që bëri në vend ky regjistrim, vendosa të vetëofrohem dhe të tregoj të gjithë të vërtetën e këtij materiali”.
Dhe për të bindur prokurorët se në këtë audio-përgjim ishte pikërtisht zëri i dëshmitarit të vetëofruar, ky personazh ka dhënë si provë zërin e tij në prokurori, duke qartësuar se zëri tjetër në audio-përgjim nuk është i Agron Xhafaj, por i këtij dëshmitari. Pas dëgjimit të pretendimeve të tij, anëtarët e grupit hetimor e kanë marrë me rezerva dëshminë e tij, kjo pasi ata janë në pritje të përgjigjes shkencore nga një laborator në Romë, Itali, i cili pritet të nxjerrë në drejtë vërtetësinë e këtij audio-përgjimi.
Në fakt edhe vetë gazetari Jetmir Olldashi që ka qenë pjesë kryesore e realizimit të këtij përgjimi çuditërisht ka ngritur hije dyshimi për vërtetësinë e tij. Olldashi ka qenë personi i cili i ka organizuar gjithçka për realizimin e këtij materiali.
Ai i ka dhënë Babales paisjen e përgjimit, madje ka hyrë bashkë me të në lokalin e Agron Xhafajt herën e parë që ai nuk ishte, por herën e dytë kur Babalja realizon takimin e pretenduar me Agron Xhafajn ku flitet për drogën, gazetari nuk ishte i pranishëm. Fakt të cilin Olldashi e ka deklaruar edhe vetë publikisht në media duke deklaruar madje se ai nuk mund të thotë 100% nëse Babalja ishte takuar atë ditë në Vlorë me Agron Xhafaj apo jo, pasi nuk e kishte parë me sytë e tij.
Një pohim i habitshëm ky duke parë veprimet e gazetarit i cili ia dorëzoi këtë audio-përgjim Partisë Demokratike me pretendimin se kishte frikë për jetën, pasi kishte zbuluar skandalin e madh të përfshirjes në trafikun e drogës së vëllait të ministrit të Brendshëm. Në këtë mënyrë kemi një përgjim që është reklamuar me të madhe si një investigim që zbardh lidhjet e trafikantëve me mbështetje politike, por që vihet në pikëpyetje nga vetë autori i tij!
Gjithsesi mbetet ajo që gazetari Olldashi ka pohuar publikisht se Babalja, ishte larguar dhe kishte hyrë në lokalin e Agron Xhafaj dhe prej andej ka ardhur me një bisedë të tillë të përgjuar. Por pavarësisht kësaj tashmë prokuroria e Krimeve të Rënda ka në dosje dhe një zë tjetër, çka detyrimisht do të kërkojë në të ardhmen kryerjen e një ekspertimi për të mësuar nëse zëri i dëshmitarit të vetëofruar është i njëjti me atë që ky person pretendon se ka aktruar Agron Xhafaj. Momentalisht në adresë të prokurorisë ende nuk ka mbëritur përgjigjia nga Italia, ku janë çuar për ekspertim zërat e Albert Veliut (Babalja) dhe Agron Xhafaj, me materialin e shfaqur në audio-përgjim./ Shqiptarja.com
