Prokuroria e Tiranës ka marrë kontakt me ish-policin e Krujës Emiljano Nuhu i cili denoncoi publikisht se është kërcënuar në zyrë gjatë hetimit të padisë së Xhisiela Malokut kundër djalit të deputetit të PS Rrahman Rraja.
Mësohet se grupi i hetimit i ngritur për këtë çështje ka marrë si detyrë, ndër të tjera edhe pyetjen e ish-policit por për shkak se ai ndodhet jashtë Shqipërisë, kontakti me prokurorinë është realizuar me anë të telefonit.
Lajmi është konfirmuar për Ora News nga burime të Prokurorisë së Tiranës, të cilat nuk saktësuan nëse bëhet fjalë për marrjen në pyetje të ish-policit apo për një kontakt të parë me të me qëllim marrjen e dëshmisë në ditët e ardhshme.
Në prokurorinë e Tiranës aktualisht janë hapur dy hetime në lidhje me çështjen e Xhisiela Malokut. Njëra dosje bën fjalë për parregullsitë e Policisë së Krujës në lidhje me këtë çështje dhe dosja tjetër ka si objekt kallëzimin e Emiljano Nuhut për kanosje nga të afërmit e deputetit Rrahman Rraja.
v.l/ Dita
