Nga Adela Kolea
Të kuptohemi: jo se protesta humb ligjshmërinë apo efikasitetin e saj për diçka të paqartë që mund të kem unë…
Paraprakisht, “Diaspora” është një term ose koncept më vete që nuk përshkruhet veç me dy fjalë dhe përbërja e Diasporës është shumë e gjerë e komplekse.
Ka kërkuar – si e drejtë e tij qytetare – lejen për protestën dhe është marrë me organizimin e saj, një i ashtuquajtur Genc Sejko.
Ai është emigrant në Londër dhe të paktën Diaspora shqiptare këtu në Itali, them se e njeh relativisht, ose s’e njeh fare.
Sidoqoftë, përtej kësaj, pasi nuk është e thënë që organizatorin e një proteste fundja ta njohësh në mënyrë të drejtpërdrejtë, nëse kauzës ti i bashkohesh a priori.
Por, diçka më mungon si detaj në lidhje me rolin apo pjesëmarrjen konkrete të Diasporës shqiptare të Italisë në këtë rast.
Pse e them këtë? 🤔
Sepse, kur disa elementë aktivë pjesëmarrës dhe shpesh, edhe të vetëquajtur “Përfaqësues të diasporës shqiptare të Italisë”, kanë pasur nevojë për vizibilitet, reflektorë, mikrofonë e telekamera, nuk kanë lënë hapësira mediatike pa u shfaqur e pa valëvitur flamurin e “përfaqësuesit të Diasporës Shqiptare të Italisë”.
Ose, kur ka qenë fjala për pjesëmarrje në Summit Diaspore apo evente të tjera pak a shumë të ngjashme – përfshirë edhe mbrëmjet Gala’ të këtyre eventeve, ose kryesisht për prezencën në ato mbrëmje…- nuk kanë lënë hapësirë pa i reklamuar bëmat e selfiet e tyre si “Përfaqësues Diaspore” në atë kontekst.
Për këtë protestë janë të padukshëm ama…🤔
Ndaj, kjo copëz e “puzzle-s” së patriotizmit të disave që na “përfaqësojnë” si Diasporë, të paktën në Itali – sipas erës që fryn e sipas natyrës së përcaktuar të eventit…- shpesh, edhe pa i zgjedhur apo pa autorizuar kush që të na përfaqësojnë, kësaj radhe, më mungoka…
Pra, Diasporë shqiptare të Italisë, a ka në këtë protestë, për kuriozitet…?
Nëse jo, – pasi protestës i bashkohet kushdo fundja, edhe pa qenë emigrant – t’i jepej një përkufizim tjetër të paktën, p.sh:
“Protestë e një grupi shqiptarësh emigrantë në Angli apo Gjermani” apo ku ta di… 🤔
Jo se, përkufizimi ndikon në ndryshimin e thelbit të protestës – ajo mbetet e njëjtë dhe një e drejtë e ligjshme – por, thjesht e kisha fjalën se më duket sikur abuzohet me ca terma, si ai “Diasporë” në këtë rast…🤔
