Presidenti i Republikës, Ilir Meta i ka dërguar sot një mesazh urimi homologut të tij Stevo Pandarovski me rastin e ditës së pavarësisë së Maqedonisë së Veriut.
Gjatë letrës së tij Meta përgëzon Pandarovskin për arritjen e marrëveshjes së Prespës si dhe uron që të dyja vendet të kenë një rrugëtim të përbashkët drejt Bashkimit Europian.
Çelja e negociatave me BE, që pritet në tetor, ka qenë një cështje e diskutuar shumë përsa i përket faktit nëse Shqipëria dh Maqedonia e Veriut do të vazhdojnë të dyja në këtë proces apo do të ndahen. Komisioni Europian dha rekomandimin e tij pozitiv për të dyja vendet megjithatë në Këshill disa shtete ishin skeptike ndaj Shqipërisë.
“I nderuar Zoti President,
28-vjetori i Ditës së Pavarësisë së Republikës së Maqedonisë së Veriut, më jep kënaqësinë e veçantë që të përcjell, në emrin tim dhe të popullit shqiptar, urimet e përshëndetjet më të ngrohta, të përzemërta e vëllazërore për Ju dhe të gjithë qytetarët Tuaj.
Shpreh bindjen time se, falë edhe vullnetit, eksperiencës dhe vizionit Tuaj, marrëdhëniet e shkëlqyera të fqinjësisë e të bashkëpunimit, që ekzistojnë ndërmjet vendeve dhe popujve tanë, do të forcohen më tej në të ardhmen.
Dëshiroj të theksoj se një ndikim shumë të madh në forcimin e marrëdhënieve midis dy vendeve ka luajtur dhe luan adresimi dhe përmirësimi i vazhdueshëm i marrëdhënieve ndëretnike. Jemi krenarë për kontributin jetik që shqiptarët në Maqedoninë e Veriut japin për stabilitetin dhe integrimin euroatlantik të vendit. Jam i bindur se komuniteti maqedonas në vendin tonë do të vijojë të jetë një urë e fortë miqësie dhe bashkëpunimi ndërmjet dy vendeve dhe popujve tanë.
Përfitoj nga rasti t’Ju përgëzoj për vizionin dhe guximin në arritjen e Marrëveshjes historike të Prespës – një shembull për gjithë rajonin – që jo vetëm do të forcojë perspektivën euroatlantike të vendit Tuaj, por do ta bëjë rajonin tonë edhe më të sigurt. Jam i bindur se vendet tona do të bashkëpunojnë ngushtësisht në kuadër të Aleancës së Atlantikut të Veriut, si dhe në rrugëtimin e përbashkët drejt Bashkimit Evropian.
Së bashku me urimet më të mira e të përzemërta për zhvillimin e përparimin e mëtejshëm të vendit Tuaj, ju lutem pranoni, Zoti President, shprehjen e konsideratës sime më të lartë”, shkruan presidenti Meta në mesazhin e tij. /Opinion.al
