Të dielën e kaluar, Donald dhe Romeo Veshaj pranuan publikisht se janë larguar nga programi që i bëri të njohur, “Al Pazar”.
Ata treguan se pas largimit do të qëndrojnë në të njëjtën familje dhe me Agron Llakajn janë ndarë miqësisht.
Vëllezërit treguan se Agronit do i jenë mirënjohës tërë jetën pasi ai i ka sjellë këtu ku janë.
Pas largimit të tyre ka reaguar për herë të parë edhe Agron Llakaj.
I ftuar në emisionin e pasdites në “Vizion Plus” ai ka treguar i prekur për largimin e tyre dhe tha se është i mërzitur pasi vëllezërit nuk e kanë marrë në telefon.
“Dera këtu është e hapur. Unë e kam treguar edhe kështu, që kur im bir u largua nga shtëpia, natyrisht ai përsëri im bir mbetet edhe pse vjen më rrallë. Ata ngelen përsëri prodhimi ynë, dhe uroj që ata të mbartin me vete dashurinë për Al Pazarin. Kam vënë re që në të gjitha promot që ne kemi vënë, ata nuk kanë klikuar dhe më ka habitur pak nuk e di pse , por më ka bërë përshtypje. Nuk kanë klikuar për ta parë, nuk e di nëse e ndjejnë si boshllëk. Megjithatë unë i kam dashur shumë, i kam mbështetur shumë dhe jam i lumtur që i kam krijuar. Uroj që në punën e tyre të kenë talentin, punën dhe mbi të gjitha mirënjohjen. Mos harrojnë ta kthejnë kokën mbrapa nga vijnë ku kanë ecur dhe ku do shkojnë”, është shprehur Agroni.
Ai ka shtuar se këto fjalë dëshironte t’ua thoshte edhe përballë, por ata nuk e kanë telefonuar që para 1 muaji.
