Nga Edlira Durmishaj
Do doja të jap tre mesazhe zemre, por që njëkohësisht mbartin përgjegjësinë e profesionit, ndërgjegjes dhe humanizmit.
• I pari, shkon për profesionistët e shëndetit mendor; Të nderuar koleg, puna juaj është e paçmueshme dhe misioni juaj sublim meriton vëmëndjen e të gjithë hallkave e strukturave të pushtetit vendor dhe ekzekutiv, për rritjen e cilësisë së shërbimeve, parandalimeve por dhe shpëtimit të jetëve që jetojnë në vuajtje.
• Së dyti, familjarëve të njerëzve që vuajnë nën një “etiketë” diagnoze ose jo.
Barra juaj është ajo më e rënda. Shpesh ju duket se nuk keni zgjidhje e se askush nuk ju kupton. Mirënjohja e gjithë botës, nuk do të mjaftonte për t’ju treguar se, pa ju misioni dhe puna jonë nuk do të kishte sukses, dhe se; Po. Ne ju kuptojmë. Ndiejmë dhimbjen tuaj, dhe marrim pak nga meraku dhe trishtimi juaj sa here që shtrëngojmë duart për t’u përshëndetur për takimin e radhës.
Ju jeni aleatët më të ndritur e më diplomat që ka parë fytyra e tokës. Por ajo që meritoni të dëgjoni sot më shumë se kurrë është se: Bashkë mund t’ja dalim për ditë më të mira e më të bukura.
•Dhe e fundit, shkon për çdo njeri, djalë apo vajzë, grua apo burrë i ri apo i moshuar që vuan me dhimbjen, ankthin, depresionin, skizofreninë:
Ju nuk jeni vetëm! Rreth e qark jush, ka kaq shumë dashuri, dritë mirënjohje e vlerësim që pret vetëm që ju të zgjasni dorën. Ne e dimë se është e vështirë. Por sot, ju duhet të mësoni atë që dimë ne: Është gjithmonë një derë e hapur për zgjidhje, ndihmë, shpresë, jetë.
Asgjë, nuk është e paarritshme.
Ju, jeni miqtë më të mirë që kemi njohur, nënat më të përkushtuara, bashkëshortët/et më besnik, studentët më të zellshëm, fëmijët më me synime, njerëzit me ndjenjën më të lartë të përgjegjësisë, ata që më shumë keni menduar e sakrifikuar për këdo, dhe veten tuaj e keni lënë mënjanë më shumë se gjithçka. E gjitha kjo ka vetëm një emër: Dashuri!
Ndaj sot, është dita, që t’ju kujtojmë se: Meritoni gjithë dashurinë, mirënjohjen, vëmëndjen dhe respektin e botës
Zoti ju bekoftë!
~ Çdo 40 sekonda, dikush humb jetën në tentativë për suicid.
Tregojuni të dashurve tuaj, se nuk janë vetëm!
