Një avokat i informatorit, që nxiti procedurat për shkarkimin e presidentit amerikan, Donald Trump, i dërgoi letër Shtëpisë së Bardhë me kërkesën për të ndalur presionin.
Në letër, Andrew Bakaj, shkruan se “retorika dhe aktiviteti” i Trump e vendosin klientin dhe familjen e tij “në rrezik fizik”. Identiteti i informatorit deri më tani është ruajtur nga rivalët e Trumpit – demokratët.
Informatori e ka ngritur ankesën në gusht, duke shfaqur shqetësim për një thirrje telefonike midis Trumpit dhe homologut të tij ukrainas, Volodymyr Zelensky.
Është thënë se Trump i ka kërkuar Zelenskyt të hetojë për korrupsion Joe Bidenin – rival i tij i mundshëm në zgjedhjet e vitit të ardhshëm.
Në letrën dërguar këshilltarit të Shtëpisë së Bardhë, Pat Cipollone, Bakaj citoi shembuj të shumtë të, siç tha, “fiksimit” të presidentit për identitetin e informatorit.
Bakaj tha se Trump me “deklarata të tilla” për mediat, në tubime dhe në Twitter e frikëson klientin e tij.
Por, Trump edhe të premten i vazhdoi sulmet kundër informatorit. “Informatori është një turp për vendin tonë, një turp”, u tha Trump gazetarëve. Presidenti hetimet kundër tij i ka cilësuar si “gjueti shtrigash”./ Opinion.al
