Nga Gladiola Busulla
Dremis mbi kraharorin tënd.
Numëroj thesaret e humbura:
rrënoja puthjesh të mbytura,
dashuri të shkokëluara,
kundërmime përqafimesh,
psherëtima të gjata si nata e Kirunës.
Graviteti më shtyn,
drejt thellësive të qenies.
Në kindat e prekjeve
gurgullojnë oazat,
përndizen flakët e ferrit,
kumbojnë tingujt e orkestrës hyjnore.
Gishtërinj të zhytyr në shkretëtirën e kujtimeve
dhe emri yt i shkruar me ujë mirazhesh.
