Nga Bardhi Sejdarasi
Vetëm dy kompani shqiptare kanë importuar nga Rusia grurë rifuxho dhe miell të bardhë gruri në thasë në muajin shkurt. Dhe vetëm një kompani hidrokarburesh ka importuar gazoil nga ky shtet në luftë. Asnjë import tjetër nuk raportohet nga Rusia, ndërsa nga Ukraina janë sjellë vetëm 29 ngarkesa me vaj lule dielli në bidona. Çmimet e zhdoganimit nuk pasqyrojnë rritje çmimi. A po abuzohet nga tregtarët me pretekstin e çmimeve të “luftës”?
Pikat e kalimit kufitar, ajror, detar dhe tokësor të Shqipërisë, në muajin shkurt, kur mes Federatës Ruse dhe Ukrahinës ka filluar konfikti i armatosur, nuk kanë pasur fluksin e zakonshëm të importeve nga këto dy vende. Autoritetet deklaruan se vetëm dy kompani shqiptare kanë importuar nga Rusia grurë rifuxho në sasinë 33 mijë ton dhe miell të bardhë gruri në thasë, në sasinë 2500 ton. Dhe vetëm një kompani hidrokarburesh ka importuar gazoil nga Rusia. Asnjë import tjetër nuk raportohet nga ky shtet, ndërsa nga Ukraina janë sjellë edhe 39 ngarkesa me vaj lule dielli në bidona. Çmimet e zhdoganimit, sipas burimeve zyrtare, nuk pasqyrojnë rritje çmimi në blerje dhe zhdoganim. A po abuzohet nga importuesit e miellit dhe të grurit me pretekstin e luftës dhe të kostove të saj?
Ende nuk ka tregues zyrtar të inflacionit, që pasqyron çmimet në treg të këtyre produkteve të përdorimit të përditshëm. Deklarimet e sipërmarrësve që ofrojnë këto produkte dhe nënproduktet e tyre nënvizojnë se do të ketë rritje çmimi për miellin dhe bukën. Në disa qytete të vendit, sipas korrespondentëve tanë, çmimi i miellit u rrit nga 6 deri 7 lekë për kilogram, duke mos pasqyruar çmimin e llogaritur nga importi deri tek shitja me pakicë.
Abuzimi i tregtarëve duket hapur: nuk ka pasur importe me çmime krize dhe nuk ka mundësi të importohet nga vendet në luftë. Shikoni këtë tabelë të publikuar posaçërisht për RTSH:
Për muajin shkurt
· Import grurë rifuxho, dy anije me peshë neto 16,5+16.5=33 mijë ton me vlerë 1,105 milionë USD, me vlerë zhdoganimi 25,1 milionë lekë
· Grurë i zakonshëm, import 2.500 tonë, me vlerë 922 mijë USD
· 22 ngarkesa me 2.408 milion litra gaz të lëngshëm të naftës, LPG, me vlerë 1 871 195.93 USD
· Vaj lule dielli, me bidona, 39 ngarkesa, ose rreth 762 mijë ton vaj, në vlerën 1098796.72 USD
· Miell i bardhë gruri në thasë, gjithsej 196.500 kg ose, në vlerë 78 337 USD
· Një kompani hidrokarburesh, import lëndë djegëse (Heavy gasoil), në masën 63 800 ton, e transportuar me cisterna, me vlerë 34.213 USD dhe vlerë zhdoganimi 3 931 921 lekë
Kushdo mund të vërejë se nuk ka ndryshime të dukshme në çmimet e importeve dhe të zhdoganimit.
Ndërsa në treg po vërehen rritje abuzive.
Sipas të dhënave zyrtare,77.5 për qind të importit të drithit, Shqipëria e realizon në Rusi e Serbi. Vendi ku Shqipëria importon më shumë drithëra është Rusia, që zë rreth 41.2 për qind të totalit në vlerë dhe, rreth 45.5 për qind në peshë.
Vendin e dytë të importeve të Shqipërisë me drithëra e ndjek Serbia, me rreth 36.2 për qind të totalit të importeve në peshë, Franca me 3.5 për qind, dhe Ukraina me rreth 2.93 për qind. Mësohet se Serbia e ka ndaluar këto ditë eksportin e këtyre produkteve.
Gjatë vitit 2020, Shqipëria ka prodhuar rreth 684 mijë tonë drithëra, ndërkohë që ka importuar rreth 364 mijë tonë. Pra, importi zë afërsisht rreth 35 për qind të kërkesës vendase të drithërave, çka do të thotë se një krizë e mundshme në arenën ndërkombëtare do të kishte ndikim të ndjeshëm edhe në tregun shqiptar. Gjatë vitit të kaluar u vu re një rritje e konsiderueshme e çmimit të bukës, edhe pse Shërbimi Doganor Shqiptar nuk deklaroi shtrenjtim të dukshëm të çmimeve në importin e grurit dhe miellit!
