Nga Artan Fuga
Mos ngatërrojmë imunitetin dhe ekstraterritorialitetin. Territori i ambasadave të huaja në në një vend ka imunitet absolut. Sipas konventave ndërkombëtare. Askush nga forcat e rendit të vendit që pret nuk mund të hyjë atje pa autorizimin e ambasadorit.
Por, aspak të ekstraterritorialitetit që është koncept juridik krejt tjetër. Pra, nuk quhet territori i ambasadave shqiptare si tokë shqiptare. Larg këtij absurditeti në normat juridike ndërkombëtare!
Pra, Presidenti i sotëm nuk e firmosi dekretin për heqjen e gradave ushtarake për kandidatin për president në “tokë shqiptare”, por m’u në majë të Stambollit!
Por pyetja është : A ka problem juridik kjo?
Aspak, edhe një herë. Sepse asnjë kufizim të kësaj natyre nuk vendos Kushtetuta e Shqipërisë. Dhe nuk mund të vendosë. Po të ishte kështu asnjë kryetar shteti nuk mund të vizitonte një vend tjetër apo të merrte pjesë në një mbledhje ndërkombëtare, apo drejtuesit e shteteve të ishin mbledhur ta zemë në Bruksel për çështje të Bashkimit Evropian!
Mos ngatërroni këtë çështje me historitë e kaluara të mbretërve klasikë! Kuptojeni historinë e institucioneve në mënyrë krahasuese dhe jo kallup! Sepse tjetër është mbreti autokrat, apo perandori që përfaqëson vetë ai me trupin e tij shtetin nga një presidenti republike parlamentare. Kur një mbret a një president është i përzënë, ose detyrohet të iki në ekzil për arsye të ndryshme, sigurisht ai e humb të drejtën të ushtrojë kompetencat e mëparshme. Ka iku nga detyra, nga funksionet, nga detyrimi, pra nuk mund të ketë më të drejta.
Por, mesa di presidenti aktual as është i përzënë nga territori, as e kanë detyruar të largohet, as ka ikur në ekzil. Si kokrra e mollës për arsyet e veta politike, që i di vetëm ai, por edhe mund të merren me mend, ka shkuar për vizitë ku e ka pritur kryetari i bashkisë së Stambollit, mesa kam marrë vesh nga media.
Pra, deri këtu asnjë problem për proçedurat e zgjedhjes të Presidentit të ri, i cili në fakt është votuar por ende nuk është konsumuar akti i zgjedhjes, pra nuk ka bërë betimin, etj, nuk ka dalë në fletoren zyrtare. Ai mund të votohej edhe pa iu hequr grada akoma, sepse të votohesh nuk është koncept juridik i njëjtë me të zgjidhesh.
Ku qendron problemi? E para, sepse Kushtetuta kërkon që presidenti të propozohet nga një grup deputetësh jo më i vogël se njëzet deputetë. Kurse presidenti nuk u propozua nga një grup i tillë deputetësh, por në emër të grupit socialist. Një “grup deputetësh jo më i vogël se 20” dhe “grupi socialist” nuk janë aspak dy nocione juridike kushtetuese të njëjta. Zëvendësimi i njerit nga tjetri është gabim.
Një e drejtë që u jepej deputetëve socialistë ta zemë në raundin e katërt, sepse të tjerët nuk kishin vepruar në raundet e tjera, u është hequr dhe i ka kaluar në mënyrë piramidale dhe autoritare “grupit socialist”.
E dyta është shpejtësia e procedurave që nuk u la kohë deputetëve as ta njohin cv e kandidatit, as të diskutojnë në grup për të, as të shqyrtojnë përputhshmërinë me kërkesat ligjore, as të intervistojnë kandidatët në grup (jo në seancë) si edhe iu kërkua presidentit aktual ta lironte nga gradat ushtarake kandidatit a thua se kishte rënë zjarri dhe duhej thirrur urgjent zjarrfiksi!!!. Ky i fundit e liroi pa asnjë shqyrtim për atë që humbte ushtria nga lirimi i një gjeneral majori, çka do të ishte mirë ta bënte duke biseduar me të interesuarin, në dinjitetin e tij, duke u konsultuar me këshillin e sigurisë kombëtare, me ministrin e mbrojtjes, etj, etj.
Por, kjo çështje e fundit ka të bëjë me seriozitetin e procedurave në shtet, që anashkalohen sipas urdhërit të kryeministrit, por jo me çështje kushtetueshmërie.
Kurse “rrëshkitja” nga “grup deputetësh” te “grupi socialist” êshtë një “normativ shift” shumë problematik nga ana e legjitimitetit juridik. Deputeti trajtohet si “burmë” dhe “vidhë” e partisë, dhe jo si bartës më vete i personalizuar juridiksioni!
Ky është debati, ky është problemi jo vetëm për këtë rast, por denbabaden.
Ne zgjedhim deputetë, por partia na i “rrëmben”, ata nuk bëzajnë, dhe nuk ushtrojnë detyrimet juridike për të cilat janë zgjedhur!
Ju hiqen kompetencat që u jep Kushtetuta dhe ata nuk bëzajnë, veç urojnë me telegrame qesharake dhe pa sens, si kartolina të Vitit të Ri, kandidatin!
