Janë zbardhur detaje të reja nga atentati në Milot ku mbeti i vrarë 28-vjeçari Klisman Preçi dhe u plagos Ylli Brahimi. Grupi hetimor ka rindërtuar dinamikën e ngjarjes. Sipas informacioneve mësohet se hetuesit kanë arritur në përfundimin se në atentat kanë marrë pjesë 4 vrasës me pagesë.
Dy kanë pasur rolin e qitësit, ndërsa një vrasës i tretë ka pritur me makinë ndezur që të realizonte largimin e menjëhershëm e dy autorëve që qëlluan me armë zjarri drejt Klisman Preçit dhe Ylli Brahimit. Më pas një autor i katërt i ka pritur tre personat, për t’u larguar me një makinë tjetër pasi dogjën makinën që përdorën në atentat në fshatin Gramëz në Krujë.
Klisman Preçi dhe Ylli Brahimi po lëviznin me një mjet të blinduar, por grupi hetimor ka arritur në përfundimin se 103 plumbat që përdorën autorët nuk kanë qenë blindshpues dhe nuk depërtuan brenda makinës. Autorët kanë pritur derisa mjeti i blinduar do të ndalonte në hyrje të pallatit dhe kanë pritur sa është hapur dera e mjetit dhe kanë hapur zjarr duke u afruar dhe në brendësi të mjetit. 27-vjeçari Preçi, i cili u qëllua i pari, ka zbritur nga makina dhe është prekur nga breshëria e plumbave, që i shkaktoi edhe vdekjen.
Në ato momente edhe Ylli Brahimi ka hapur derën dhe ka tentuar të dalë nga mjeti në të cilin ishte si pasagjer, por përballë të shtënave pa ndërprerje që kanë zgjatur afro 3 minuta, ai ka hyrë sërish në makinë për t’u mbrojtur nga plumbat.
Në qendër të Milotit aty ku ndodhi atentati nuk ka kamera sigurie dhe as ato kamera që ishin pranë banesës së shënjestrave të atentatit, nuk punonin. Por grupi hetimor ka sekuestruar disa kamera të tjera në akset e qytetit dhe në autostradë që tregojnë automjetin e vrasësve duke u larguar.
Për të shkuar në gjurmët e autorëve grupi hetimor po kryen edhe përgjime dhe ekspertizën e makinës së djegur të autorëve, që u gjet në fshatin Gramëz.
360grade.al
