Të hënën e 23 Tetorit shqiptarët në Shtetet e Bashkuara të Amerikës kanë paralajmëruar se do të protestojnë para selisë së OKB-së në New York, kundër terrorizmit dhe akteve të Serbisë në Veri të Kosovës.
Në një njoftim për mediat, komuniteti shqiptaro-amerikan lajmëron se do të drejtojë thirrjen për SHBA-të që të përdorë të gjitha mjetet e nevojshme për të detyruar Serbinë që të ndalojë veprimet dhe politikat kundër Kosovës, shkruan Telegrafi.
“Të Hënën, më 23 Tetor 2023, komuniteti Shqiptaro-Amerikan do të protestojë para Selisë së OKB-së në Sheshin Dag Hammarskjöld në New York për t’i dënuar aktet e vazhdueshme të terrorizmit dhe luftënxitëse të Serbisë. Shqiptaro-Amerikanët i bëjnë thirrje Shteteve të Bashkuara të Amerikës dhe komunitetit ndërkombëtar që të përdorin të gjitha mjetet e nevojshme për ta detyruar Serbinë që t’i ndalojë dhe të përmbahet nga veprimet dhe politikat që janë duke e minuar stabilitetin e Kosovës dhe Ballkanit”, thuhet në njoftim.
Më tej kërkohet që Serbia të mbajë përgjegjësi për sulmin e 24 Shtatorit, si dhe të gjithë të përfshirët të çohen para drejtësisë.
“Më 24 Shtator 2023 terroristët dhe njësitë para-ushtarake nga Serbia ndërmorën një sulm terrorist në Kosovë. Komuniteti shqiptaro-amerikan kërkon që Serbia dhe udhëheqësit e saj të mbahen përgjegjës, si dhe të gjithë të përfshirët në aktet e agresionit dhe terrorizmit të sillen para drejtësisë”, thuhet në njoftim.
Komuniteti shqiptaro-amerikan thekson se “rajoni i Ballkanit është një fuqi baruti”.
“Nëse nuk ndërhyhet, mund të ndizet një luftë e re në zemër të Evropës e që do të jetë një luftë shtesë me të cilën do të duhet të ballafaqohet komuniteti ndërkombëtar”, paralajmërohet në njoftimin për mediat.
360grade.al
