Në pak më shumë se 7 muaj nga pija e fundit, truri riparon pothuajse plotësisht dëmtimin strukturor të shkaktuar nga përdorimi i tepërt i alkoolit. Një lajm inkurajues për ata që luftojnë me çrregullimin e përdorimit të alkoolit (AUD) vjen nga një studim i kryer në Shtetet e Bashkuara, i cili tregon se sa shpejt strukturat neurologjike të komprometuara nga konsumimi i alkoolit kthehen në pamjen e tyre normale kur ndërpritet ky zakon.
Ata që vuajnë nga çrregullimi i përdorimit të alkoolit (AUD), një patologji e konsideruar si një çrregullim i trurit dhe i karakterizuar nga një aftësi e reduktuar për të ndaluar ose kontrolluar konsumimin e alkoolit, priren të shfaqin rrallim në disa rajone të korteksit, indi nervor që përfaqëson pjesën më të jashtme të vertebrorëve, që është thelbësore për funksionet më të rëndësishme njohëse.
Disa nga këto ndryshime e bëjnë më të vështirë për njerëzit me konsum kronik të alkoolit që të ndalojnë pirjen, duke nxitur varësinë. Për shembull, korteksi paraballor, thelbësor për proceset e vendimmarrjes, mund të bëhet më pak aktiv, duke e bërë të vështirë marrjen e vendimeve në të mirë të shëndetit.
Në studimin e ri të koordinuar nga Timothy Durazzo, i Departamentit të Psikiatrisë dhe Shkencave të Sjelljes të Shkollës së Mjekësisë të Universitetit Stanford në SHBA, u përfshinë 88 pjesëmarrës me çrregullim të përdorimit të alkoolit, të cilët iu nënshtruan disa skanimeve të trurit pas një jave, një muaji dhe 7.3 muaj mungese. Disa pjesëmarrës iu bashkuan studimit pas muajit të parë dhe vetëm 40 nga 88 vazhduan të mos konsumonin alkool për të gjithë periudhën e studimit. Trashësia e korteksit të tyre cerebral u krahasua me atë të 45 njerëzve të tjerë që nuk kishin vuajtur kurrë nga AUD, e matur gjithashtu 9 muaj më vonë për t’u siguruar që rajonet e matura në fakt kishin mbetur të njëjta me kalimin e kohës.
Ekipi mati trashësinë e 34 zonave të korteksit. Të gjitha ato treguan një ndryshim më të shpejtë në trashësi nga java e parë në muajin e parë pas konsumimit të fundit të alkoolit, por një trashje graduale vazhdoi, megjithëse me një ritëm më të ngadaltë, deri në përfundim të studimit, pas 7.3 muajsh mungesë.
Deri më tani, shumica e studimeve të këtij lloji kanë monitoruar ndryshimet strukturore në tru pas maksimumi një muaj esëll, prandaj zbulimi se truri vazhdon të vetë-ristrukturohet edhe më vonë dhe për një periudhë kaq të gjatë kohore është një lajm shumë pozitiv.
Pas 7.3 muajsh mungese, trashja kortikale ishte statistikisht e rëndësishme në 25 nga 34 rajonet dhe 24 prej tyre u shfaqën ekuivalente në trashësi me ato të subjekteve të kontrollit.
Trashja e korteksit ndodhte më ngadalë në disa pjesë të trurit të njerëzve me AUD që kishin gjithashtu presion të lartë të gjakut ose kolesterol të tepërt, si dhe te duhanpirësit. Edhe nëse kampioni i studiuar është ende shumë i vogël dhe jo shumë heterogjen, ka shpresë se rezultati do t’i inkurajojë ata që me vështirësi të mëdha përpiqen të çlirohen nga varësia ndaj alkoolit, të ngulmojnë në përpjekje. Studiuesit nënvizojnë se studimi nuk thotë asgjë për funksionalitetin e rajoneve që janë kthyer në trashje. Efekti praktik i këtij rikuperimi në funksionet njohëse do të duhet të hetohet në studime të mëtejshme
360grade.al
