Foto cover nga VCG
Aleanca Botërore e Arsimit Digjital u përurua të martën gjatë Konferencës Botërore të Arsimit Digjital 2024 në Shangai, me qëllim promovimin e bashkëpunimit dhe shkëmbimit ndërkombëtar në këtë fushë.
Liu Limin, president i Shoqatës së Arsimit të Kinës për Shkëmbimin Ndërkombëtar, tha gjatë përurimit se transformimi digjital i arsimit është një përpjekje kolektive në reformën arsimore globale dhe një mënyrë inovative për të përmirësuar cilësinë e arsimit.
Ai tha se aktualisht në aleancë janë përfshirë 104 universitete, organizata ndërkombëtare arsimore dhe ndërmarrje nga 41 vende dhe rajone.
E bashkorganizuar nga Ministria e Arsimit, Komisioni Kombëtar Kinez për UNESCO-n dhe Qeveria Popullore e Shangait, konferenca eksploroi praktikat dhe risitë në arsimin digjital. Simona-Mirela Miculescu, presidente e sesionit të 42-të të Konferencës së Përgjithshme të UNESCO-s, tha se edukimi digjital është një plotësues i fuqishëm i metodave tradicionale të të mësuarit, duke pasuruar dhe transformuar arsimin.
“Edukimi digjital ka potencialin e jashtëzakonshëm për të përmirësuar cilësinë dhe rëndësinë e të mësuarit dhe për të nxitur përfshirjen”,- tha Miculesku.
Edukimi digjital është gjithashtu një mjet thelbësor për sigurimin e vazhdimësisë së të mësuarit gjatë kohëve të krizave, duke pasur parasysh përvojën e pandemisë Covid 19, shtoi ajo.
Milan Kuzmanoviç nga ambasada serbe në Kinë ka marrë pjesë në konferencë për dy vite radhazi dhe ishte i impresionuar nga mënyra se si platformat e mësimit online në Kinë u mundësojnë studentëve qasje më të madhe në arsim.
“Kam pasur rastin të mësoj se si studentët në fusha të ndryshme në Kinë kanë mundësinë të mësojnë nga profesorët më të mirë në universitetet më të mira, duke ndjekur kurset e përditësuara në internet”, – tha ai.
Kina ka shtuar përpjekjet vitet e fundit për të promovuar zhvillimin e arsimit digjital global dhe bashkëpunimin ndërkombëtar të arsimit online. Ajo ka krijuar bibliotekën më të madhe të burimeve të arsimit dhe trajnimit në botë, sipas Ministrisë së Arsimit.
“Vendi ka shkallën më të madhe në botë të Kurseve Masive të Hapura Online dhe ky sistem është bërë një markë ndërkombëtare e arsimit të lartë në botë”,- tha Song Yi, një zyrtar i Departamentit të Arsimit të Lartë të ministrisë.
Foto nga VCG
Në vitin 2020, Universiteti Tsinghua ndërmori Aleancën Globale të Kurseve Masive të Hapura dhe Arsimit Online, organizata e parë ndërkombëtare shumëpalëshe në arsimin e lartë digjital, që përfshin 17 universitete të njohura dhe gjashtë institucione arsimore online nga 16 vende.
Deri tani, 341 kurse globale janë nisur nën këtë aleancë, me afro 25.4 milionë nxënës që marrin pjesë, tha Song.
“Rreth 88 universitete kineze kanë ofruar rreth 300 Kurse Masive të Hapura Online me cilësi të lartë për më shumë se 3000 institucione të arsimit të lartë në Indonezi”,- tha ai.
Në semestrin e vjeshtës që sapo ka përfunduar, rreth 500 studentë indonezianë të kolegjit iu bashkuan klasave të studentëve me të njëjtat drejtime në 25 universitete kineze.
Song shtoi se Universiteti i Xi’an Jiaotong në provincën Shaanxi ka kultivuar talentin në transportin hekurudhor në dhjetëra vende përmes kurseve në internet që mbulojnë 100,000 nxënës, ndërsa Universiteti Jugor i Shkencës dhe Teknologjisë ndihmoi 13 vende, përfshirë Kamboxhian dhe Kenian, të ndërtojnë klasa të zgjuara.
Për më tepër, Konferenca Globale e Arsimit Online dhe Kurseve të Hapura është mbajtur katër herë që nga viti 2020 si një platformë e rëndësishme për shkëmbimin global. Vitin e kaluar, konferenca u mbajt në Milano të Italisë, duke shënuar herën e parë që ky aktivitet mbahej jashtë Kinës.
Colin Bailey, president i Universitetit Queen Mary të Londrës dhe anëtar i Akademisë Mbretërore të Inxhinierisë në Mbretërinë e Bashkuar, tha se Kina dhe vendi i tij kanë një partneritet të gjatë në arsimin e lartë digjital.
Vitin e kaluar, platforma e edukimit digjital “FutureLearn” me bazë në Mbretërinë e Bashkuar u përfshi në Aleancën e Kurseve të Hapura Online.
“Ne po shkëmbejmë kurse në të gjithë kurrikulën, nga mjekësia dhe stomatologjia, shkenca dhe inxhinieria, biznesi, ekonomia dhe drejtësia”,- tha Bailey.
E ardhmja e edukimit digjital qëndron te bashkëpunimi dhe ne do të punojmë së bashku për të prodhuar teknika që përmirësojnë arsimin për brezin e ardhshëm”,- tha ai./artikulli dhe fotot janë ofruar nga CRI.CN
