Fjalë të një shoqërie që mbetet për t’u ndrequr?
Për gratë, nga Dashnor Kokonozi
Në fillim po lexoja një histori prekëse, pastaj doli të ishte edhe problem ngarkese emocionale i ndonjë fjale, që nuk më përputhej me ngjarjen.
Gjatë një ceremonie martese (të një familjeje të rindërtuar, rikompozuar), ndryshe nga sa priste auditori i mbledhur në sallën e martesave të bashkisë, nusja në deklaratën e saj të dashurisë përfshiu edhe Henrin, djalin e burrit me të cilin po martohej.
- Henri, i tha ajo thjeshtrit të saj, nuk isha aty ditën kur ti erdhe në këtë botë. As kur kur ti fole fjalët e tua të para, as kur hodhe hapat e parë. Por të premtoj se do të jemi bashkë për shumë përvoja të reja të para në jetën tënde….
Vanesës, kështu quhet gruaja, i dridheshin duart, sytë i shndrisnin nga lotët. Rrotull saj salla kishte rënë në një qetësi të thellë. Kërkush nuk e kishte pritur një gjë të tillë, nuk ishte zakon t’i drejtoheshe dikujt që nuk ishte fëmija i yt biologjik.. - Unë të premtoj, vazhdoi ajo, se do të dua si birin tim. Të premtoj se do të jem nusja më e mirë e babait tënd. Dhe së fundi të premtoj se do të jem njerka më e mirë e mundëshme për ty !
Këto fjalë të dala nga zemra prekën të gjithë të pranishmit.
Craig-ut, burri i saj, dhe Henrit të birit të tij iu mbushën syt ë me lot.
Henri i vogël nuk kishte pritur më shumë se aq që të leshohej drejt e në krahët e njerkës së tij, mes duartokitjeve të sallës.
- Mua më mbeti ajo shija e çuditëshme e fjalës “njerkë” ndërsa e përktheja me mend. Zakonisht nuk me ndodh, nuk kam nevojë për ndërmjetësinë e shqipes. Por këtë herë, ngarkesa e saj emocionalisht negative, e ushqyer nga përralla të panumërta (se kam njohur njerka të shkëlqyera), nuk më përputhej me këtë histori kaq të bukur. Në shqip është edhe një sinonim i saj, (vitërkeshë), që po ta përdorja do të detyroja ndonjë të më shikonte me dyshim.
Kontrasti i “njerkes” me fjalet perkatese të gjuhve të tjera, të sjell ndërmend trashëgiminë e një universi të tere marrëdheniesh sociale dramatike e për më teper, të paragjykuara që në origjinë!
