Ministrja e Shtetit për Marrëdhëniet me Parlamentin, Elisa Spiropali ka reaguar mbrëmjen e sotme lidhur me tensionin e shkaktuar nga deputetët e opozitës në Konferencën e Kryetarëve dhe në mbledhjen e Komisionit të Ekonomisë.
Në një reagim në rrjetet sociale Spiropali shkruan se deputetët e PD-së kanë dhunuar institucionet e Kuvendit në shkelje të plotë të çdo ligji, rregulli dhe kodi.
Ajo thekson se ata kanë nëpërkëmbur detyrën dhe përdhosur misionin kushtetues, duke dashur të pengojnë prezantimin e Buxhetit 2024 në Konferencën e Kryetarëve dhe në Komisione Parlamentare”.
“Sot, në shkelje të plotë të çdo ligji, rregulli dhe kodi, duke nëpërkëmbur detyrën dhe përdhosur misionin kushtetues, disa deputetë të opozitës, kanë dhunuar institucionet e Kuvendit duke dashur të pengojnë prezantimin e Buxhetit 2024 në Konferencën e Kryetarëve dhe në Komisione Parlamentare.
Të nderuar kolegë dhe kolege: nuk j’ua kanë fajin dyert e Kuvendit! Dera ku kanë thirrur të përgjigjet të parin tuaj, as hapet prej nesh, as mbyllet prej nesh.
Koha kur ajo derë hapej për armiqtë dhe mbyllej për shokët, aleatët dhe miqtë ka marrë fund. Kuptojeni!
Kthehuni në Kuvend dhe bëni punën tuaj!”, shkruan Spiropali./Opinion.al
